Maǵzum Myrzaǵalıev qaı óńirlerdegi egis alqaptarynda sý tapshylyǵy bolýy múmkin ekenin aıtty

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Maǵzum Myrzaǵalıev elimizdiń qaı óńirlerindegi egis alqaptarynda sý tapshylyǵy bolýy múmkin ekenin aıtty, dep habarlaıdy QazAqparat tilshisi.

«Bıylǵy vegetatsııalyq kezeńge daıyndyq máselesi de mańyzdy bolyp otyr. 2020 jylǵa arnalǵan gıdrologııalyq boljamǵa sáıkes, elimizdiń ońtústik jáne batys aımaqtarynda sý az bolýy múmkin. Osyǵan oraı biz tıisti sharalar qabyldadyq. Sý qoımalarynyń jumys kestesi qaıta qaralyp, ázirlendi. Osy jumys kestelerin daıyndaý barysynda sýarmaly jerlerdi sýmen qamtamasyz etý esepke alyndy. Qazirgi tańda sý qoımalary toltyrylyp jatyr», - dedi mınıstr Úkimet otyrysynda.

Qyzylorda, Túrkistan, Jambyl jáne Almaty oblystarynda 205 kılometr kanal tazalandy jáne bul jumys ári qaraı jalǵasýda. Sondaı-aq, 335 gıdrotehnıkalyq nysan jóndelip, 39 kılometr kanaldar betonmen qaptaldy.

«Sonymen birge, kórshi memleketterde de sý tapshylyǵy baıqalyp otyr. Bul rette olardan bizge qajetti sý kólemi kelmeı qalady degen qaýip bar. Osyǵan baılanysty Aýyl sharýashylyǵy mınıstrligine Túrkistan, Qyzylorda jáne Jambyl oblystarynyń ákimdikterimen birlesip, osy aqparatty dıhandarǵa, sharýashylyq ıelerine jetkizýdi suraımyz. Osy jaıtty eskere otyryp, olar daıyndyq jumystaryn júrgizý qajet. Biz óz tarapymyzdan ózbek, qyrǵyz jáne tájik áriptesterimizben tıisti jumys júrgizip jatyrmyz. Bizdiń basty nazarda – Syrdarııa, Shý, Talas ózenderi, sondaı-aq memleketaralyq kanaldar boıynsha Túrkistan, Qyzylorda jáne Jambyl oblystaryna qajetti sý túsýin qamtamasyz etý. Osyǵan oraı, vıdeobaılanys arqyly 10 sáýirde sý sharýashylyq mınıstrlikteriniń arasynda konsýltatsııalar ótkizý josparlanǵan», - dedi M. Myrzaǵalıev.