Maǵzum Myrzaǵalıev balyq sharýashylyǵyn sýbsıdııalaý usynysyn qoldady
«Oral-Atyraý bekire balyq ósirý zaýyty» RMKK-degi sharaǵa Atyraý oblystyq ákimdiktiń ókilderi, «BD – Balyq sharýashylyǵy qaýymdastyǵy» ZTB, saladaǵy birneshe kásiporyn basshylary qatysyp, balyq sharýashylyǵyndaǵy problemalar kóterildi,
Mınıstr Myrzaǵalıev balyq sharýashylyǵynda óńirdiń alatyn orny erekshe ekenin, qazir memleket tarapynan bul salaǵa kóp kóńil bólinip jatqanyn atap ótti.
«Qazaqstanda aýlanatyn balyqtyń otyz paıyzǵa jýyǵy (29,2 paıyz, 13,0 myń tonna) osy oblysqa tıesili. Kaspııge quıatyn eki iri balyq sharýashylyǵy sý aıdyndary – Jaıyq pen Qıǵash ózenderinde 20 tabıǵat paıdalanýshy óz kásipterin iske asyryp jatyr. Balyq ósirýmen qatar balyq aýlaýdyń atyraýlyq balyqshylarǵa mańyzdy ekenin biz esepten shyǵarmaımyz. Ásirese Kaspııde teńiz balyqtary ıgerilmeı jatqanyn eskersek, óńirde balyq aýlaý kólemin odan da arttyrýǵa bolady. Osy sharýashylyqtyń damýyna serpin beretin usynystar bolyp jatsa, biz birlesip qaraýǵa ázirmiz», - dedi mınıstr.
Jıynda kásipkerler salyqtyq jeńildikter men sýbsıdııalaý boıynsha usynystar bildirdi. Mınıstr bul bastamalardy qoldaıtynyn jetkizdi.
«Bul máseleler Qarjy, Ulttyq ekonomıka mınıstrlikteri sııaqty basqa da múddeli memlekettik organdarmen birlesip qaraýdy jáne kelisýdi talap etedi. Sondyqtan biz tıisti ózgerister engizý úshin sizdiń taraptan naqty esepteýler men negizdemeler qajet. Orman sharýashylyǵy jáne janýarlar dúnıesi komıtetine atalǵan máselelerdi sizdermen birlesip qaraýdy tapsyramyn. Kóterilgen máseleler oń sheshimin tapqan jaǵdaıda balyq sharýashylyǵynyń áleýeti kóterilip, kásipkerlerdiń jumysy odan ári jandanatyny sózsiz», - dedi M.Myrzaǵalıev.
Mınıstr barlyq jergilikti balyq sharýashylyǵy ókilderin 24 qyrkúıekte Premer-Mınıstr Asqar Mamınniń qatysýymen Shardara qalasynda ótetin balyq sharýashylyǵy boıynsha respýblıkalyq semınarǵa qatysýǵa shaqyrdy. Onda kásipkerlerge balyq aýlaý men balyq ósirýdi qatar júrgizý tájirıbesi tanystyrylmaq.
Eske salsaq, balyq salasyndaǵy óńirdiń ereksheligin eskere otyryp, 27 aqpanda Atyraý qalasynda Balyq sharýashylyǵyn damytý máseleleri týraly Úkimettiń jınalysy ótken. Oǵan Premer-mınıstr Asqar Mamın tóraǵalyq etti. Sol kezde Úkimet basshysy bergen tapsyrmalardyń birazy sheshimin taýyp jatyr. Atyraýlyq balyqshylardyń ótinishi boıynsha Kaspıı teńizi men Jaıyq ózeninde balyq aýlaý merzimderi uzartyldy.
Sonymen birge, osy jyldyń 18 tamyzynda balyq sharýashylyǵynyń perspektıvalary boıynsha Úkimeti otyrysynda 1 qarashaǵa deıin oblys ákimdikterine balyq sharýashylyǵyn damytýdyń óńirlik baǵdarlamalaryn ázirleý tapsyryldy. Bul aımaqtarda, onyń ishinde Atyraý oblysynda da balyq sharýashylyǵyn qarqyndy damytýǵa óz septigin tıgizbek.
