Maǵzum Myrzaǵalıev balyq sharýashylyǵyn damytýdyń 4 faktoryn atady
«Balyq sharýashylyǵyn damytýdyń óńirlerdegi jobalaryn iske asyrý úshin 10 jyl ishinde 345 mlrd teńge jeke ınvestıtsııa tartý kózdelip otyr. Balyq sharýashylyǵyn tabysty túrde damytý úshin biz 4 negizgi faktordy anyqtadyq. Olar: zańnamany jetildirý, sapaly balyq shabaqtarymen qamtamasyz etý, balyq jeminiń óndirisin jolǵa qoıý, kadrlyq qamtamasyz etý», - dedi Maǵzum Myrzaǵalıev Úkimet otyrysynda.
Mınıstr osy tórt faktor týraly qysqasha aıtyp berdi. Onyń sózinshe bıznes úshin tıimdi sharttar jasaýǵa baǵyttalǵan zańnamalardy jetildirý sheńberinde birqatar jumys atqarylǵan. Birinshiden, balyq resýrstaryn paıdalanǵany úshin jyldyq tólemniń ornyna, toqsan saıynǵy tólem engizilgen. Osynyń aldynda bıznes ruqsat alǵanǵa deıin balyq aýlaý tólemderin tóledi. Bul aıtarlyqtaı qarjylyq júktemege aınalyp, kóbinese nesıe qarajatyn alýǵa nemese aınalym qarajatynan jumsaýǵa ıtermelegen.
«Ekinshiden, balyq sharýashylyǵy sý aıdyndaryn balyq aýlaýdan balyq ósirýge aýystyrý qaǵıdalary bekitildi. Bul kásipshilik balyq aýlaýdy júzege asyratyn paıdalanýshylarǵa, ásirese kóptegen kólderi bar soltústik aımaqtarda balyq ósirýge múmkindik beredi. Úshinshiden, balyq sharýashylyǵyn júrgizý úshin 49 jylǵa shart jasasýdyń naqty merzimi belgilendi. Bul bızneske senimmen ınvestıtsııa salýǵa jáne uzaq merzimdi josparlar qurýǵa múmkindik beredi. Buryn sharttyń merzimi 5 jyl men 49 jyldyń arasynda bolatyn. Tórtinshiden, damý josparlary aıasynda balyq ósirýshilerge qoıylatyn artyq talaptar alynyp tastaldy. Olarǵa qoıylatyn jalǵyz talap-balyq ósirýdiń jyl saıynǵy kólemin oryndaý. Budan basqa, jyl sońyna deıin sý qorǵaý beldeýinde balyq ósirý sharýashylyqtaryn ornalastyrý boıynsha shekteýlerdi alyp tastaý týraly normalar qabyldanady», - dedi ol.
