M. Myrzaǵalıev Jańaózen kásipodaqtarymen kezdesýde QazMunaıGazdyń aldaǵy jospary týraly aıtty
«QazMunaıGaz» UK AQ (QMG) basqarma tóraǵasy Maǵzum Myrzaǵalıev Jańaózenniń enshiles táýeldi uıymdarynyń (ETU) kásipodaq basshylarymen jáne eńbek ujymdary ókilderimen jyl saıynǵy dástúrli kezdesýin ótkizip, alańdatqan suraqtarǵa jaýap berdi jáne QMG-niń qoǵamdyq ınstıtýttarmen odan ári ózara is-qımyl josparyn belgiledi, dep habarlaıdy Kazinform.
Kezdesý barysynda M.Myrzaǵalıev kásipodaq uıymdarynyń basshylaryn QMG-niń óndiristik baǵdarlamalardy oryndaý jáne eńbek ujymdarynda áleýmettik turaqtylyqty saqtaý boıynsha qabyldap jatqan sharalarynan habardar etti, Sondaı-aq olardy ótken QR kásipodaqtary kúnimen quttyqtady.
Ol 2022 jyldyń kúzinde ótken kezdesýde Jańaózen qalasynyń, jalpy Mańǵystaý óńirindegi halyqtyń ál-aýqatyna qatysty máseleler talqylanyp, olardy sheshý úshin usynystar ázirlengenin eske saldy.
M.Myrzaǵalıev kásipodaq jetekshilerine ulttyq kompanııanyń bir jyl ishinde atqarǵan jumysyn tolyq tanystyrdy.
Máselen, bir jyl buryn óńirdegi basty másele retinde kóterilgen aýyz sý tapshylyǵyn sheshý úshin qyrkúıek aıynda sý tuşytý zaýytynyń qurylysy bastaldy.
Qurylys kezeńinde 242 jańa jumys ornyn ashý, al 2024 jyly kásiporyn iske qosylǵanda 116 adamdy turaqty jumysqa alý josparlanyp otyr.
Qazirdiń ózinde daıyndyq kezeńinde jumyssyzdar qatarynan 80 adam eńbekke tartyldy. Odan bólek, bıyl «Astrahan-Mańǵystaý» magıstraldy sý qubyryn keńeıtý jumystary aıaqtalady. Bul sý qubyrynyń ótkizý múmkindigin táýligine 60 myń tekshe metrge — 170 myńǵa deıin arttyrady.
Osydan bir jyl buryn kásipodaqtar elektr qýatyn turaqty jetkizý máselesin kótergen bolatyn. Bul boıynsha 2023 jyly maýsymda Mańǵystaý oblysynda jel, kún jáne gaz negizinde jumys isteıtin qýaty 120 MVt gıbrıdti elektr stantsııasyn salý úshin ıtalııalyq ENI kompanııasymen kelisimge qol qoıyldy. Bul bastama óndiristiń apatty jaǵdaıda toqtaýyn boldyrmaýǵa, sondaı-aq jańa jumys oryndaryn ashýǵa kómektesedi.
Sonymen qatar, M.Myrzaǵalıev Jańaózen qalasynda aıaqtalýy 2026 jylǵa josparlanǵan jańa gaz óńdeý zaýytyn salý jobasy qarqyndy júrip jatqanyn habarlady. Qurylys kezeńi men zaýyt iske qosylǵanda ashylatyn jańa jumys oryndary qaladaǵy áleýmettik turaqtylyqqa da oń áser etedi.
Odan bólek, «Ózenmunaıgaz» AQ (ÓMG) qyzmetkerleriniń jalaqysyna ındeksatsııa júrgizý, eńbekaqy tóleýdiń biryńǵaı júıesine ózgerister engizý, «Jarqyn bolashaq» bilim berý jobasyn iske asyrýdy jalǵastyrý, sondaı-aq basqa da sharalarǵa toqtaldy.
Osylaısha, M.Myrzaǵalıev byltyr kóterilgen máselelerdiń basym bóligin sheshý barysy týraly habardar ete otyryp, jumysshylardyń áleýmettik-eńbek quqyqtary men múddelerin qorǵaý, olardyń ómir súrý deńgeıin arttyrý boıynsha úılesimdi jumysty jalǵastyrý, óńirdiń tıimdi ekonomıkalyq damýy úshin jaǵdaı jasaý — kompanııa men kásipodaqtardyń ortaq mindeti ekenin basa aıtty.
Sonymen qatar, ol kún tártibinde óndiris mádenıetin damytý, tehnologııalyq reglamentterdi saqtaý, óndiriste eńbek tártibin saqtaý máseleleri ótkir turǵanyn atap ótti. Eń mańyzdy mindet — munaı óndirý deńgeıin arttyrý jáne ony sheshý úshin barynsha kúsh salý qajet ekeni aıtyldy.
«Bul rette kásipodaqtar eńbek ujymdarymen júıeli jumysty qamtamasyz etýge jumylýy keregin atap ótkim keledi. Sebebi, bul máseleni tek jergilikti jerlerde júıeli túrde sheshýge bolady», — dep atap ótti QMG basshysy.
Kásipodaq ókilderi úsh kúnge sozylǵan trenıng formatynda ótken jıynda QMG basshylyǵymen enshiles uıymdardy damytý máseleleri men ulttyq kompanııanyń kásiporyndary ornalasqan óńirlerde áleýmettik ál-aýqatty arttyrý joldaryn ashyq talqylaýǵa múmkindik aldy.
Kásipodaq jetekshileri QazMunaıGaz basshysynyń bastamasymen jyl saıyn ótetin bul kezdesýlerdiń joǵary nátıje beretinin jáne basshylyq pen eńbek ujymdary ókilderiniń arasynda tıimdi kommýnıkatsııany jolǵa qoıýǵa yqpal etetinin atap ótti.
