Maǵjannyń 130 jyldyǵy: Aqynnyń týǵan aýylynda saltanatty is-shara ótti

ASTANA. QazAqparat - Májilis tóraǵasy Erlan Qoshanov Memleket basshysynyń tapsyrmasymen Maǵjan Jumabaevtyń týǵanyna 130 jyl tolýyna arnalǵan saltanatty is-sharaǵa qatysty, dep habarlaıdy QazAqparat.

Mereıtoıǵa arnalǵan jıyn aqynnyń týǵan jeri Soltústik Qazaqstan oblysy M.Jumabaev aýdanynyń Sarytomar aýylynda ótti. Májilis spıkeri Prezıdent Qasym-Jomart Toqaev Maǵjan Jumabaevtyń 130 jyldyǵyn joǵary deńgeıde atap ótýdi tapsyrǵanyna toqtaldy.

Erlan Qoshanov aqynnyń jerlesterin mereıtoımen quttyqtap, Memleket basshysynyń quttyqtaý hatyn oqyp berdi.

– Maǵjan Jumabaev – qazaqtyń ǵana emes, tutas túrki jurtynyń maqtanyshy. Aqynnyń Otanǵa degen sheksiz súıispenshilikke toly jyrlary halqymyzdyń júregine jol taýyp, rýhanııatymyzdyń altyn qoryna endi. Men Túrkistanda ótken Ulttyq quryltaıda jastardyń boıyna izgi qasıetterdi sińirý qajettigine erekshe toqtaldym. Bul ultymyzdyń jańa sapasyn qalyptastyrý úshin óte mańyzdy. Osy oraıda Maǵjandy taný, Maǵjandy tanytý – tárbıelik ári taǵylymdyq máni bar másele. Sol sebepti onyń shyǵarmashylyǵyn tereń zerdelep, jan-jaqty dáripteý kerek. Artynda ólmeıtuǵyn sóz qaldyrǵan aqynnyń mol ádebı murasy talaı býynǵa ónege bolary sózsiz. Onyń ómirsheń óleńderi halyqpen birge jasaı beredi, – delingen Prezıdent quttyqtaýynda.

Májilis tóraǵasy Qyzyljar óńiri ultymyzdyń taǵdyry men tarıhyna óshpes iz qaldyrǵan uly perzentterdi dúnıege ákelgen kıeli meken ekenin erekshe atap ótti.

– Sarytomarlyqtar sonaý zamannyń qıyn kezinde, Maǵjannyń atyn ataýǵa tıym salynǵan ýaqytta da ataqty jerlesteriniń atyn óshirmeı, jan-júregimen qasterlep keldi. Esterińizde bolsa, osydan otyz jyl buryn Maǵjan Jumabaevtyń 100 jyldyq mereıtoıy respýblıka kóleminde tuńǵysh ret atalyp ótken bolatyn. Sodan beri otyz jyl ótse de, halqymyzdyń Maǵjan tulǵasyna, Maǵjan murasyna degen yqylasy men mahabbaty ózgergen emes. Qaıta jyl ótken saıyn eselep artyp keledi, – dedi Erlan Qoshanov.

Elimizde bolyp jatqan oń ózgerister ultymyzdyń uly tulǵalarynyń, sonyń ishinde Maǵjan Jumabaevtyń ıdeıalarymen úndesip jatqanyn tilge tıek etti.

– Maǵjan degende – halqymyzdyń HH ǵasyrdaǵy almaǵaıyp, aýyr taǵdyry kóz aldymyzǵa keledi. Aqynnyń «Kúnshyǵystan kún keledi – men kelem» degen bir jol óleńi búgingi táýelsiz Qazaqstannyń armany men muratynyń uranyndaı. Búgingi urpaq osy kúnge, osy armanǵa, osy muratqa umtylýy qajet, – dedi Májilis Tóraǵasy.

Mereke aıasynda oblysta halyqaralyq aqyndar aıtysynyń fınaly, at sporty men qazaqsha kúresten jarys ótti.