Maǵjanmen taıtalasqan aqyn

ALMATY. QazAqparat - Almatyda Qazaqstannyń halyq jazýshysy, kórnekti aqyn Ábdilda Tájibaevtyń týǵanyna 105 jyl tolýyna oraı «Óleńmen órnektelgen ómir» atty ádebı sazdy kesh ótti.

Bul keshke aqynnyń kózin kórgen aqyn-jazýshylar, ǵalymdar, qatysty. Muqaǵalı atyndaǵy syılyqtyń ıegeri, aqyn Orazaqyn Asqar Ábdilda Tájibaevtyń ómiri jaıly estelikter aıtyp, óleńder oqysa, jazýshy-dramatýrg Beksultan Nurjekeev pen fılologııa ǵylymdarynyń doktory, professor Sársenbi Dáýituly arnaıy baıandamalar jasady. Jastarǵa taǵlymdyq estelikter aıtty.

«Ábdildanyń qazaq ádebıeti salasyna sińirgen eńbegi ushan-teńiz, - dedi aqyn Orazaqyn Asqar, - Ábdilda ustaz aqyn, ǵalym aqyn! Biraq birinshi kezekte ol asqan lırık aqyn! Jıyrmasynshy ǵasyrdyń uly lırık aqyny Maǵjan Jumabaev bolsa, Ábdilda sol Maǵjanmen lırıka áleminde taıtalas bolǵan aqyn! Ábdildanyń jas aqyndarǵa shapaǵaty kóp tıgen. Ol Muqaǵalıdyń óleńderin shyǵarýǵa kóp kúsh salǵan adam».

Ábdilda Tájibaevtyń anasy Aımangúl de aqyn bolǵan eken. Jazýshylar odaǵynyń múshesi bolyp, kezinde úsh-tórt kitap shyǵarypty. 1936 jyly Máskeýde ótken qazaq ádebıeti men óneriniń on kúndigine Ábdilda Tájibaev anasymen birge qatysqan eken.

Al kesh sońynda, Ahmet Baıtursynov atyndaǵy №139 orta mekteptiń oqýshylary men Almaty kóp salaly kolledjiniń stýdentteri aqyn shyǵarmalarynan óleńder oqydy.

Osy mádenı shara ótken Qazaqstan jazýshylary kitaphanasynda Ábdilda Tájibaevtyń shyǵarmalaryna arnalǵan kitap kórmesi uıymdastyryldy.