Maǵjan Jumabaevtyń shyǵarmalary makedon tiline aýdarylady

SKOPЬE. QazAqparat - TÚRKSOI halyqaralyq uıymy Makedonııanyń Skope jáne Gostıvar qalalarynda «Túrki áleminiń uly perzentteri» atty halyqaralyq ǵylymı konferentsııalar ótkizdi, dep habarlaıdy QazAqparat.

Eki konferentsııa da bıyl TÚRKSOI uıymy tarapynan ataýly jyl bolyp jarııalanǵan qyrǵyz jazýshysy Shyńǵys Aıtmatovtyń 90 jyldyǵyna jáne qazaq aqyny Maǵjan Jumabaevtyń 125 jyldyǵyna arnaldy.

TÚRKSOI uıymynyń bas hatshysynyń orynbasary Fyrat Pýrtash bastaǵan resmı delegatsııa men jıynǵa qatysýshy ǵalymdardy Makedonııa Syrtqy ınvestıtsııalar mınıstri Adnan Kahıl jáne Mádenıet mınıstri Asaf Ademı arnaıy qabyldap, uıymnyń mádenı ıntegratsııa salasyndaǵy jańashyl jobalaryna tabys tiledi.

Konferentsııada sóz alǵan ǵalymdar qazaq aqyny Maǵjan Jumabaev pen qyrǵyz jazýshysy Shyńǵys Aıtmatov muralarynyń túrki halyqtarynyń mádenı ómirindegi orny men mańyzyna toqtalyp, olardyń álem ádebıetine ákelgen jańalyqtaryn sóz etti.

Jıyn kezinde «Maǵjan Jumabaev jyly» aıasynda basylyp shyqqan aqynnyń úsh jınaǵy tanystyryldy. Olardyń birinshisi - túrik tiline jańadan aýdarylǵan (aýdarmashy - Álı Akbash) «Alystaǵy baýyryma» jınaǵy, ekinshisi - aqynnyń on eki tildegi aýdarmalarynyń toptama jınaǵy (qurastyrǵan - Asqar Turǵanbaev), úshinshisi - ázerbaıjan tilindegi (aýdarmashy - Ramız Ásker) Maǵjannyń «Túrkistan» toptamasy.

Skope qalasyndaǵy Makedonııa memlekettik ýnıversıtetiniń Túrkologııa bóliminde jáne Gostıvar qalasyndaǵy Vızıon ýnıversıtetterinde ótkizilgen konferentsııalardyń nátıjesinde Maǵjan Jumabaevtyń muralaryn makedon tiline aýdarý kelisildi.