Maǵjan Jumabaevtyń ishigi tabyldy

Qasqyr ishiktiń búgingi ıesi, Kókshetaý qalasynyń turǵyny Bátıma Aıaǵanova Qaraǵandy muǵa­lim­­der ınstıtýtyn 1951 jy­ly bitirgen. Ǵumyrynyń 52 jylyn bilim salasyna arnaǵan ulaǵatty ustaz óz áýletinde 30-jyldardan beri saqtalyp kele jatqan qas­qyr ishikti qymbat jádigerine sa­naıdy. El-jurtqa erterek ta­nystyrmaǵanynyń syryn amanat júginiń aýyrlyǵymen túsindiredi.

Apaıdyń aıtýyna qaraǵanda, jeti qasqyrdyń terisinen tigilgen. Jony qara qyl­­shyqtanǵan, túgi men túbiti sol qalpy saq­talǵan, syrty qalyń, myqty shuǵamen qaptalǵan óner týyndysy derlik. Shalǵaıy mol pishilgen, qoltyǵy keń, jaǵasy oıyqtalyp, moıyn men basty tutas jabatyn kól-kósir dúnıe. Ileýi ábden qandyrylǵan ishik qabyrǵanyń jasaýyn jarqyratyp tur. Qanshama ýaqyt ótse de, óńin joımaǵan. Túz taǵysynyń qasıeti de myqty-aý.

Bul ishiktiń tarıhy da tereń. Bátıma Áshir­bekqy­zynyń ákesi Áshirbek ata qazirgi Soltústik Qazaq­stan oblysynyń Ýálıhanov aýda­nynyń aýmaǵyndaǵy Úlken Qaraoıdyń mańynda 1883 jyly dúnıege kelgen. Anasy Shákıra Áýbá­kirqyzy Kishi Qaraoıdyń qyzy. Anasynyń inisi, ıakı naǵa­shysy Jaqııa Áý­bá­kir­uly zamanynda Omby qalasynda bilim alǵan. Keıin Bestóbeniń mańaıyn­daǵy Qy­zylqaq aýylynda muǵalim bolyp eńbek etipti. Burynǵylardyń aıtýyna qaraǵanda, jyr alyby Maǵjanmen ákesi de, naǵashysy da dos-jar bolsa kerek. Bátıma Áshir­bekqyzynyń biletini, kózi ashyq, kókiregi oıaý, jaq­sylarmen kóp dámdes, pikirles bolǵan, bir-birine shýaq-shara­paty tıgen ákesine osy jádigerdi áıgili aqyn Maǵ­jan Jumabaev syılaǵan eken.

Sol kezderi Kishi Qaraoı tó­ńi­­­­­­­re­ginde Kenetaı esimdi on saýsaǵynan óner tamǵan aıtýly sheber bolypty. Qasqyr ishikti sol Kenetaı sheber tikken. Keıin arada talaı jyldar ótken soń Bátıma Áshir­bekqyzynyń joldasy, Uly Otan soǵysynyń ar­da­geri Qaıyrbek Hasenov Almaty qala­syndaǵy joǵary partııa mektebin bitirip kelip, Qyzyltý aýdanynyń «Herson» keńsharyna partkom hatshysy bolyp taǵaıyn­dalady. Osy bir qýanysh­qa Bá­tıma Áshirbekqyzynyń ákesi, ıaǵnı, qaıyn atasy: «Meniń shańy­raǵym­daǵy eń qymbat múlkim, Alashtyń aıtýly aqyny, jyr áleminiń jaryq juldyzy Maǵjan Jumabaevtan qalǵan jádiger», - dep syıǵa tartsa kerek. Sodan beri úıdegi tórt qulaqty abdyrada saq­talypty.