Maǵjan Jumabaevtyń 9 tilge aýdarylǵan óleńderi úsh kitap bolyp shyqty
ASTANA. QazAqparat - Astanadaǵy kitap kórmesi ótip jatqan «Kórme» ortalyǵynda aqyn Maǵjan Jumabaevtyń 9 tilge aýdarylǵan 3 kitabynyń tusaýkeseri bolyp ótti. Kitaptardyń aýdarylýyna Halyqaralyq Túrki akademııasy (TWESCO) muryndyq bolyp otyr, dep habarlaıdy QazAqparat tilshisi.
Tusaýkeserde sóz sóılegen Túrki akademııasynyń prezıdenti Darhan Qydyráli aqynnyń óleńderin aýdarýǵa bilikti mamandar tartylǵanyn atap ótti.
«Maǵjan aqyn ómirin Túrkistanǵa arnaǵan Ortalyq Azııanyń ortaq aqyny. Táýelsizdik pen tutastyqty, ásemdik pen batyrlyqty, eldikti jyrlaǵan tulǵa. Biz Túrki akademııasy bıylǵy jyldy Aıtmatovtyń 90 jyldyǵy jáne Maǵjan Jumabaevtyń 125 jyldyǵy dep jarııaladyq. Osy jyl aıasynda Maǵjannyń jyrlary 9 tilge aýdaryldy. Atap aıtqanda, aǵylshyn, túrik, ázerbaıjan, mońǵol, ózbek, qyrǵyz, altaı, bashqurt tilderine aýdarylyp otyr. Qazirgi ýaqytta aqynnyń óleńderi basqa tilge de tárjimalanyp jatyr. Sondyqtan, osy aptanyń sońynda ıÝNESKO-da ótetin M.Jumabaev pen Sh.Aıtmatovqa baılanysty úlken jıynnyń aldynda kitap kórmesinde Jazýshylar odaǵymen aqyldasyp, búgingi tusaýkeserdi ótkizýdi jón dep tapqan edik», - dedi ol.
Kitaptyń biri taza ózbek tilinde jaryq kórgen. Úsh kitaptyń biriniń tusaýyn kesken Qazaqstan Jazýshylar Odaǵynyń tóraǵasy, aqyn Ulyqbek Esdáýlet shara barysynda Maǵjan Jumabaevtyń «Men jastarǵa senemin» atty óleńin oqyp berdi.
Aqynnyń aıtýynsha, Túrki akademııasynyń belsene kirisip, Maǵjannyń 125 jyldyǵyna shyǵaryp otyrǵan 9 tildegi jınaǵy buryn sońdy bolmaǵan basylym.
«Aqyn alpysynshy jyldary aqtalǵanymen, shyǵarmalaryna tyıym salynyp, óleńderi jaryq kórmeı kelgen. Sekseninshi jyldardyń aıaǵynda arystarmen birge aqtalǵannan keıin aqynnyń shyǵarmalary arhıvterden jaryq kóre bastady. Buryn Maǵjannyń túrik tilinde shyqqan óleńderi bizdiń Ǵabıt Músirepovte ǵana bolǵan edi. Ol kisi bizge bere qoıa ma? Ony bizdiń Rymǵalı Nurǵalıev sekildi ǵulama ǵalymdarymyz aqyryndap surap alyp oqyp, kóshirip alyp, Jarasqan Ábdiráshev, Nesipbek Aıtulylaryna berip, olardan biz kóshirip, Maǵjandy esikti bekitip alyp, oqıtyn edik. Mine, qazir Maǵjannyń óleńderi búkil álemniń ıgiligine aınalyp otyr. Kitaptardyń ǵumyry uzaq, taralymy kóp bolsyn», - dedi Ulyqbek Esdáýlet.
Jıyn sońyna qaraı Darhan Qydyráli Maǵjannyń óleńin ár tilderde sóıletken, atap aıtqanda altaı tiline aýdarǵan Buryntaı Bedıýrovke, ázerbaıjan tiline aýdarǵan Fızýlı Majıdıge, bashqurt tilinde sóıletken Ahat Salıhovqa, túrik tiline aýdarǵan Alı Akpashqa, ózbek tilinde jeke jınaq retinde shyǵarǵan Muzafar Ahmatqa, qyrǵyz tiline aýdarǵan Akbar Rysqulǵa, mońǵol tiline aýdarǵan Júkel Hamaı men Aqedil Toıshanulyna jáne basqa da aýdarmashylarǵa alǵysyn bildirdi.
