Maǵjan Jumabaevtyń 125 jyldyǵyn merekeleýge jeti elden delegatsııa keledi
PETROPAVL. QazAqparat - Maǵjan Jumabaevtyń 125 jyldyǵyn merekeleýge Soltústik Qazaqstan oblysyna jeti eldiń delegatsııasy keledi, dep habarlaıdy QazAqparat tilshisi.
Óńirlik kommýnıkatsııalar qyzmetiniń aqparaty boıynsha, merekelik medaldar men kitaptar daıyndalyp jatyr.
«Túrkııa, Ózbekstan, Ázerbaıjan, Qyrǵyzstan, AQSh, Bashqurtstan men Reseı Federatsııasynyń shekaralyq óńirlerinen delegatsııalar keledi. Qurmetti qonaqtardy kútip otyrmyz - Jazýshylar odaǵynyń músheleri, maǵjantanýshy ǵalymdar, aqynnyń týystary, gala-kontsert qatysýshylary - «Maǵjan kóktemi» respýblıkalyq óner festıvaliniń júldegerleri shaqyrtyldy», - dedi tilderdi damytý basqarmasynyń basshysy Kemel Ospanov.
Merekelik taqyryptar boıynsha úsh kitap - «Qazaqtyń Maǵjany» ekitomdyǵy, «Maǵjan Jumabaev» entsıklopedııasy jáne M.Qozybaev atyndaǵy SQMÝ-dyń «Bizdiń Maǵjan» sýretti jınaǵy baspaǵa daıyndalyp jatqanyn atap ótti.
«Bul kitaptar M.Qozybaev atyndaǵy SQMÝ-da halyqaralyq konferentsııada tanystyrylady. «Qazaqtyń Maǵjany» eki tomdyǵy 500 dana, entsıklopedııa - 1000 danamen shyǵarylady. «Qazposhta» AQ-men merekelik poshta markalaryn shyǵarý máselesi sheshildi. Merekelik medaldar jasalynyp jatyr», - dep atap ótti K.Ospanov.
Maǵjan Jumabaev aýdany ákiminiń orynbasary Saltanat Áriphannyń aqparaty boıynsha, negizgi is-sharalar ótetin Sarytomar aýylynyń aýmaǵynda etnoaýyl uıymdastyrylady.
23-25 maýsymda Maǵjan Jumabaev aýdanynda respýblıkalyq Maǵjan oqýlary, ulttyq sport túrlerinen jarystar ótedi.
25 maýsymda Petropavlda №5 SQMÝ ǵımaratynyń mańynda Maǵjan Jumabaev eskertkishiniń saltanatty ashylýy bolady. Ýnıversıtet bazasynda otandyq jáne sheteldik ǵalymdardyń qatysýymen «Maǵjan Jumabaevtyń murasy jáne rýhanııat» halyqaralyq ǵylymı-praktıkalyq konferentsııasy josparlanýda.
Іs-sharanyń sońynda «Maǵjan kóktemi» V Respýblıkalyq óner festıvali gala-kontserti uıymdastyrylmaq.
