Magomed Adıev: Bul — Adıev qana emes, búkil quramanyń fenomeni
Fýtboldan Qazaqstan ulttyq qurama komandasynyń bas bapkeri Magomed Adıev San-Marınomen ótetin erteńgi kezdesýge oraı ótken baspasóz konferentsııasynda jankúıerlerge alǵys aıtty, dep habarlaıdy Kazinform.
«Jankúıerlerimizge alǵysymyz sheksiz. Bul shynymen qymbat nárse. Ulttar lıgasynan bastaǵan jolymyz áli esimde. Qarsylasymyz Ázerbaıjan bolǵan edi. Sol kezde stadıon meniń shashym sııaqty bolǵan (kúledi — red.). Ár jerde jaltyrap, bos oryndar kórinip turdy. Al qazir eń úlken qurama komandanyń birimen oınaǵaly jatpasaq ta, eki táýlik qalǵanda bılettiń bári satylyp ketken. Onyń ústine taǵy bılet surap jatyr. Federatsııadaǵylar ne isterin bilmeı, basyn ustap, daǵdaryp jatqanyn bilemin. „Tym bolmaǵanda bir bılet berińdershi“ dep suraýshylar kóbeıgen. Ony bári biz úshin qymbat dúnıe», — dedi ol.
Bas bapker qazaqstandyq jankúıerlerdiń adaldyǵyna da rıza ekenin atap ótti.
«Sizderdiń qarsylas komandalardyń juldyzdaryn kórýge emes, óz quramańyzdy qoldaýǵa kele bastaǵandaryńyzdy kórip júrmin. Bul — úlken abyroı. Osyndaı mártebeni ustap turý biz úshin shynymen de abyroı. Sizderge kóp rahmet», — dedi Magomed Adıev.
Sondaı-aq, ol komanda kóshbasshylarynyń biri Ashat Taǵybergenniń erteńgi oıynda alańǵa qatysa almaýyna baılanysty pikir bildirdi.
«Men Ashatqa aıttym. Qazir qasymyzda júr. Slovenııaǵa da alyp baramyz. Óıtkeni bizge onyń alańda ǵana emes, onyń syrtynda da birge bolǵany mańyzdy. Bahamen (Baqtıer Zaınýtdınov — red.) de osyndaı áńgime boldy. Ol osy oıynǵa kelmek bolǵan. Biraq jaraqatymen ushpaýǵa keńes beripti. Slovenııaǵa ushyp keletin shyǵar dep úmittenemiz. Osylaısha birligimizdi pash etkimiz keledi», — dedi bapker.
Magomed Adıev ulttyq quramanyń osyǵan deıingi jeńisterinde búkil ujymnyń eńbegi jatqanyn aıtty.
«Bul — jalǵyz Adıevtiń nemese jekelegen oıynshylardyń fenomeni emes. Bul — búkil quramanyń fenomeni. Onyń syrtynda federatsııanyń eńbegi bar», — dedi ol.
