Magnýs Karlsen: Shahmat týraly oılaýdy eshqashan toqtatqan emespin

ALMATY. QazAqparat - Qazaqstanda zııatkerlik oıynǵa qyzyǵýshylyq aıtarlyqtaı artqan. Bul týraly Óńirlik kommýnıkatsııalar qyzmetinde ótken baspasóz máslıhatyna belgili norvegııalyq shahmatshy, shahmattan qazirgi álem chempıony Magnýs Karlsen aıtty, dep habarlıady QazAqparat tilshisi.

Magnýs Karlsenniń pikirinshe, sońǵy jyldary búkil álemde, sondaı-aq Qazaqstanda zııatkerlik oıynǵa qyzyǵýshylyq aıtarlyqtaı artqan. Onyń ózindik birqatar sebebi bar.

«Sońǵy eki jylda kovıd pandemııasyna baılanysty adamdar tórt qabyrǵaǵa qamalyp, úıde otyrýǵa májbúr boldy. Shyn máninde, shahmat ıntellektýaldy oıynǵa aınaldy, ony oınaý úshin adamnyń qaı jerde júrgeni mańyzdy emes, úıde de oınaýǵa bolady. Sondaı-aq, «Patshaıym júrisi» telehıkaıasy úlken tanymaldyqqa ıe boldy, ol da shahmatty tanymal etýde yqpal etti. Keıingi kezde adamdar tek tán saýlyǵyna ǵana emes, oıdyń saýlyǵyna mán bere bastady. Sonymen qatar, shahmat – psıhıkalyq densaýlyqty saqtaýdyń tamasha tásili», - dedi Magnýs Karlsen.

Sondaı-aq chempıon kóptegen shahmatshylardyń kásibı psıhologtardyń qyzmetine júginetinin tilge tıek etti. Biraq ózi atalǵan mamandarǵa júginip kórmegen.

«Men ózimniń ne istep jatqanymdy, qarsylastarymnyń ne istep jatqanyn jáne ár oıynda meniń joǵaryǵa kóterilýim men quldyraýyma ne sebep bolatynyn jaqsy túsinemin. Árıne, men júginip, keńes alatyn jaqyn adamdarym bar, biraq eshqashan psıhologqa júginbeppin», - dep jaýap berdi spıker jýrnalısterdiń suraǵyna.

Baspasóz máslıhaty barysynda ol jarystarǵa qalaı daıyndalatynyn aıtyp berdi.

«Mende naqty anyqtalǵan strategııa joq. Men shahmat týraly oılaýdy eshqashan toqtatqan emespin. Bul menimen ómir súretin nárse. Men qalaı oınaımyn, kimmen oınaımyn dep oılaımyn. Ne isteý kerek jáne ne istemeý kerektigi týraly kásipqoılar bólisetin jalpy keńester bar. Shahmat meni ımprovızatsııaǵa jáne oılanýǵa jeteleıdi», - dedi Magnýs Karlsen.

Álemdik shahmat juldyzy bul týrnırde úlken tartysty oıyn bolatynyn atap ótti.

Sondaı-aq ol almatylyqtarǵa qonaqjaılylyǵy úshin alǵysyn bildirdi

«Meniń ıyǵyma qazaqtyń ulttyq shapanyn japty. Bul «Qazaqstanǵa qosh keldińiz» degendi bildiredi»,- dedi ol.

Aıta keteıik, Almatydaǵy Balýan Sholaq atyndaǵy sport jáne mádenıet saraıynda shahmattyń rapıd jáne blıts túrinen álem chempıonaty ótip jatyr.