Magnum-nyń Óskemendegi sýpermarketi merzimi ótken taýarlar satyp kelgen — «Jańa adamdar»
ASTANA. KAZINFORM — «Jańa adamdar» jastar qozǵalysy Óskemendegi «Magnum» sýpermarketi merzimi ótken taýar satyp jatqanyn áshkereledi.
— «Vremıa ısteklo» azamattyq naýqany aıasyndaǵy reıd kezinde Óskemendegi Jeńis kóshesi, 10 úıde ornalasqan Magnum sýpermarketi merzimi ótken taýar satqany anyqtaldy. Belsendiler birneshe arba buzylǵan ónim tapty. Kóptegen taýardyń jaramdylyq merzimi bir jyldan asyp ketken. Barlyq zań buzý faktileri tirkelip, sýpermarketke eskertý jasaldy, basshylyq jaǵdaıdy túzetýge ýáde bergen, — dep jazady qozǵalystyń baspasóz qyzmeti.
Biraq dúken basshylyǵy ýádesinde turmaǵanǵa uqsaıdy.
— Alaıda bir aı ótken soń jaǵdaı ózgermedi. Qaıta barǵanda da merzimi ótken taýarlar sóreden tabyldy. Kerisinshe merzimi ótken taýar arta túsken. Onyń ishinde et pen sút ónimderi de bar. «Jańa adamdar» qozǵalysynyń belsendileri Magnum-nyń merzimi ótken ónimderin úsh bóshkege salyp, «Magnum merzimi ótken taýar satady», «Bul qoqys — sizderge satpaq bolǵan ónim» degen jazýy bar kólikke tıep, qalany túgel aralap shyqty. Osydan keıin taýardy dúkenge qaıta ótkizdi. Osy kezde Magnum-nyń Óskemendegi saýda jelisine jaýapty dırektor dúkenge keldi. Ol belsendilermen birge sórelerdegi merzimi ótken taýardyń mólsheri kóp ekenine kóz jetkizip, sol jerde esepten shyǵaryp, joıýǵa jiberdi. Dırektor Magnum dúkenderinde mundaı jaǵdaı qaıtalanbaıtynyn aıtyp, ýáde berdi, — deıdi qozǵalys ókili Ámına Amanbaeva.
«Jańa adamdar» qozǵalysynyń belsendileri tutynýshylardy dúkenderde merzimi ótken ónim kezdesse, sýretke túsirip, qoǵamdyq qozǵalystyń áleýmettik jelidegi baılanys arnalaryna jiberýge shaqyrady.
Buǵan deıin «Jańa adamdar» qozǵalysy astanalyq klınıkadaǵy jalǵan anyqtama satý deregin áshkerelegen edi.