Magıstratýraǵa túsýge arnalǵan keshendi testileý bastaldy
ASTANA. KAZINFORM — Búgin magıstratýraǵa túsýge arnalǵan keshendi testileý bastaldy, ol 10 tamyzǵa deıin jalǵasady.
Esterińizge sala ketsek, Keshendi testileýdi tapsyrýǵa ótinish qabyldaý 1 maýsym men 8 shilde aralyǵynda ǴJBM Ulttyq testileý ortalyǵynyń saıtynda app.testcenter.kz júzege asyryldy.
Bıyl magıstratýraǵa túsýge arnalǵan keshendi testileýge 51 myńnan astam ótinish qabyldandy. Eń kóp tańdalǵan bilim berý baǵyttary qatarynda «Pedagogıkalyq ǵylymdar», «Injenerlik, óńdeý jáne qurylys salalary» jáne «Bıznes, basqarý jáne quqyq» bar.
Ǵylymı-pedagogıkalyq magıstratýraǵa túsý úshin keshendi testileý elektrondyq formatta ótkiziledi jáne úsh bólimnen turady: shet tili boıynsha test, oqýǵa daıyndyǵyn anyqtaýǵa arnalǵan test jáne bilim berý baǵdarlamalary tobynyń beıini boıynsha test. Testileýge 3 saǵat 55 mınýt beriledi. Shekti ball – 75 ball, onyń ishinde shet tili boıynsha keminde 25 ball, oqýǵa daıyndyǵyn anyqtaýǵa arnalǵan test boıynsha – keminde 7 ball, bilim berý baǵdarlamalary tobynyń beıini boıynsha: birinshi beıindi pán boıynsha – keminde 7 ball, ekinshi beıindi pán boıynsha – keminde 7 ball.
Beıindi magıstratýraǵa túsýge nıetti túsýshiler tek bilim berý baǵdarlamalary tobynyń beıini boıynsha test tapsyrady. Shekti ball keminde 30 ball, onyń ishinde birinshi beıindi pán boıynsha – keminde 7 ball, ekinshi beıindi pán boıynsha – keminde 7 ball quraıdy.
Testileý nátıjelerimen kelispegen jaǵdaıda onlaın-apellıatsııa berýge bolady. Testilenýshi emtıhan aıaqtalǵannan keıin 30 mınýt ishinde apellıatsııaǵa ótinish bere alady. Apellıatsııa bes kún ishinde qarastyrylady, odan soń sertıfıkat oqýǵa túsýshiniń Jeke kabınetinde qoljetimdi bolady.
Esterińizge sala ketsek, magıstratýrada oqý úshin 2025 jyly 13 myńnan astam grant bólingen. Kadrlardy daıarlaýǵa arnalǵan granttar suranysqa ıe baǵyttar boıynsha bólinedi.
Grant konkýrsyna qujattardy qabyldaý 12-18 tamyz aralyǵynda júzege asyrylady, al grant ıegerleriniń tizimi 25 tamyzǵa deıin jarııalanady. Bolashaq magıstranttardyń JJOKBU-na qabyldanýy 28 tamyzǵa deıin aıaqtalady.
Aıta ketelik 1 maýsymnan bastap magıstratýraǵa túsý úshin keshendi testileýge tirkeý bastalatyny týraly jazǵan edik.