Magıstratýraǵa túsý úshin keshendi testileý: 130 adamnyń nátıjesi joıyldy

ASTANA. KAZINFORM — Testileýdi 49 myńǵa jýyq adam magıstratýraǵa túsý úshin KT tapsyrdy. Ǵylymı-pedagogıkalyq baǵyt boıynsha túsýshilerdiń 50%-y, beıindi baǵyt boıynsha 21%-y shekti ball jınady. Bul týraly Ǵylym jáne joǵary bilim mınıstrliginiń baspasóz qyzmeti habarlady. 

Ǵylymı-pedagogıkalyq baǵyt boıynsha ortasha kórsetkish 77 baldy, beıindi baǵyt boıynsha 23 ball boldy. Eń joǵary ball — 139.

KT barysynda 130 qatysýshynyń nátıjesi joıyldy. Onyń ishinde 79 oqýǵa túsýshi smartfon, shpargalka jáne basqa da tyıym salynǵan zattardy alyp ótýge tyrysqany úshin test tapsyrý múmkindiginen aıyryldy. Keshendi testileý kezinde erejelerdi buzǵany úshin aýdıtorııadan 35 adam shyǵarylyp, olardyń nátıjeleri joıyldy. Testileýge kirgizý barysynda 1 bógde adamnyń testileýge kirý áreketi anyqtaldy. 15 adamnyń nátıjesi testileý beınejazbasyn tekserý nátıjesinde joıyldy.

Ǵylymı-pedagogıkalyq baǵyt boıynsha magıstratýraǵa túsý úshin keminde 75 ball, beıindik baǵyt boıynsha keminde 30 ball jınaý qajet.

Grant konkýrsyna qujattardy qabyldaý 12-18 tamyz aralyǵynda júzege asyrylady, al grant ıegerleriniń tizimi 25 tamyzǵa deıin jarııalanady. Bolashaq magıstranttardyń JJOKBU-na qabyldanýy 28 tamyzǵa deıin aıaqtalady.

Konkýrsqa qatysý úshin kelesi qujattardy tapsyrý qajet: jeke kýáliktiń kóshirmesi, joǵary bilimi týraly qujat (dıplom jáne qosymshasy); KT sertıfıkaty jáne shet tilin meńgergendigin rastaıtyn halyqaralyq sertıfıkattar (bar bolǵan jaǵdaıda). 075/ý nysanyndaǵy medıtsınalyq anyqtamany joǵary oqý ornyna túskende tapsyrady.

Qujattardy tapsyrý kezinde oqýǵa túsýshi bilim berý baǵdarlamalarynyń bir tobyn jáne úsh joǵary oqý ornyn kórsete alady.

Aıta ketelik magıstratýraǵa túsýge arnalǵan keshendi testileýdiń aralyq nátıjesi jarııalanǵan edi.