Magıstratýraǵa túsý úshin test tapsyrýshylardan 252 smartfon alyndy

KÓKShETAÝ. QazAqparat - Aqmola oblysynda talapkerlerdiń magıstratýraǵa túsýi úshin testileýden ótý protsessine júrgizilgen qoǵamdyq monıtorıntiń qorytyndysy shyǵaryldy.

Bul týraly «Aqmola adaldyq - alańy» jobalyq keńsesiniń jetekshisi Samıra Táıtenova aıtty, dep habarlaıdy QazAqparat tilshisi Aqmola oblysy boıynsha jemqorlyqqa qarsy is-qımyl departamentiniń baspasóz qyzmetine silteme jasap.

Osyǵan deıin habarlaǵanymyzdaı, Aqmola oblysynda tamyzdyń 10 – 14 aralyǵynda Sh.Ýálıhanov atyndaǵy Kókshetaý memlekettik ýnıversıtetiniń bazynda keshendi testileý ótkizildi.

Uıymdastyrýshylar jáne stýdentter tarapynnan zańbuzýshylyqqa jol bermeý maqsatynda qoǵamdyq monıtorıng júrgizildi.

Buǵan baıqaýshy retinde Aqmola oblysy boıynsha jemqorlyqqa qarsy is-qımyl departamentiniń qyzmetkerleri, «Aqmola adaldyq - alańy» jobalyq keńsesiniń jáne qoǵam ókilderi tartyldy. Baıqaýshylar testileý zaldarynda ornatylǵan beınebaqylaý kameralary arqyly testileý protsessin onlaın rejımde baqylap otyrdy. Nátıjesinde testileý ótken 5 kúnniń ishinde 8 testileý zalynan qýyldy.

Ýnıversıtet ǵımaratyna kire beriste, ruqsat etilmegen zattar men jabdyqtar anyqtaldy. Onyń ishinde 252 smartfon bar. Jalpy, testileýge ótinish bergen 535 talapkerdiń 503 qatysty.

«Budan bólek, biz talapkerlerdiń tehnıkalyq jáne kásibı bilim berý uıymdaryna túzý kezinde tapsyratyn emtıhandaryna qatysýdy josparlap otyrmyz. Qazirgi kezde, uıymdastyrý máselesin sheshý boıynsha jumystary júrgizilýde», deıdi Samıra Táıtenova.