Magıstratýraǵa túsý kezinde bakalavrıat beıinine qaraı shekteý engizile me – Ǵylym mınıstrligi jaýaby

ASTANA. KAZINFORM – Ǵylym jáne joǵary bilim mınıstrligi Májilis depýtattarynyń magıstratýraǵa túsý kezinde bakalavrıat beıinine qaraı shekteý engizýge qatysty saýalyna jaýap berdi.

- «Bilim týraly» Qazaqstan Respýblıkasynyń Zańyna sáıkes joǵary oqý ornynan keıingi bilim berýdiń bilim berý baǵdarlamalary joǵary bilikti pedagogtardy, ǵylymı qyzmetkerler men basqarýshy kadrlardy daıarlaýǵa, olardyń ǵylymı, pedagogıkalyq jáne kásiptik daıarlyq deńgeıin dáıekti arttyrýǵa baǵyttalǵan. Búgingi tańda magıstratýra baǵdarlamalary sabaqtas pándi tereńdetýge nemese buryn alǵan bilimderin jańa quzyrettermen tolyqtyrýǵa múmkindik beredi. Bir salada bazalyq bilim alǵan joǵary oqý oryndarynyń túlekteri oqý nemese praktıkalyq qyzmet barysynda kóbinese kásibı baǵytty ózgertý nemese keńeıtý qajettiligin túsinedi jáne qoldanystaǵy qabyldaý mehanızmi olarǵa mansaptyq nemese bilim berý josparlaryn túzetýge múmkindik beredi, - dedi Ǵylym mınıstriniń mindetin atqarýshy Dınara Şeglova jaýabynda.

Onyń atap ótýinshe, bakalavrıat beıinine qatań baılanystyrmaı magıstratýraǵa túsýge jiberý halyqaralyq tájirıbege sáıkes keledi. Álemniń jetekshi ýnıversıtetterinde tek beıin ǵana emes, sonymen birge akademııalyq jetistikter, bilimdi joǵary akademııalyq deńgeıde meńgerý jáne qoldaný qabileti, usynystar men praktıkalyq tájirıbeniń bolýy baǵalanady. Bolon protsesine qatysatyn elderde magıstratýra baǵdarlamalaryna jetkilikti daıyndyq pen qyzyǵýshylyq bolǵan jaǵdaıda túsýge bolady.

- Bul tanylǵan tásilden bas tartý qazaqstandyq joǵary oqý oryndarynyń básekege qabilettiligin tómendetýi, halyqaralyq baǵdarlamalarǵa (Erasmus+, DAAD, Fulbright) qatysý múmkindigin shekteýi yqtımal. Sonymen qatar, joǵary oqý ornynan keıingi bilim berýdiń memlekettik jalpyǵa mindetti standartyna sáıkes magıstratýranyń bilim berý baǵdarlamasynyń beıini joǵary bilimniń bilim berý baǵdarlamasymen sáıkes kelmegen jaǵdaıda magıstrantqa ıgerý úshin prerekvızıtter belgilenedi. Qajetti prerekvızıtterdiń tizbesin jáne olardy ıgerý merzimderin JJOKBU derbes aıqyndaıdy. Sondyqtan magıstratýraǵa túsý kezinde bilim berý baǵdarlamasynyń beıini sáıkes kelmegen jaǵdaıda mindetti túrde qajetti prerekvızıt tapsyrylady. Bul tásil oqý baǵytyn tańdaýda ıkemdilik pen zeıin arasyndaǵy tepe-teńdikti qamtamasyz etedi, - dedi Dınara Şeglova.

Vıtse-mınıstrdiń atap ótýinshe, 2018 jyldan bastap joǵary jáne joǵary oqý ornynan keıingi bilim berýdiń memlekettik standarttary oqý nátıjelerine baǵdarlana otyryp neǵurlym ıkemdi ázirlendi. Osy standarttarda bakalavrıattaǵy barlyq joǵary oqý orynynyń akademııalyq derbestigi - 80, magıstratýrada – 85, doktorantýrada 90 paıyzǵa deıin keńeıtildi.

- Búginde JOO-lar jumys berýshilermen tyǵyz ózara is-qımylda ekonomıka salalarynyń qajettiligin eskere otyryp, bilim berý baǵdarlamalaryn derbes ázirleıdi. Bul bilim berý qyzmetterin usyný sapasynyń kórsetkishi bolyp tabylatyn suranysty belgileıtin naryq. Óz kezeginde, bul básekelestikti kúsheıtedi, sapany jaqsartady, ıkemdi bolýǵa jáne kez kelgen ózgeristerge tezirek jaýap berýge múmkindik beredi. Aıta ketý kerek, jyl saıynǵy bakalavrıat bitiretin 150 myń adam, onyń ishinde 16 myń adam ǵana magıstratýraǵa túsedi, ıaǵnı 11 paıyzy ǵana. Magıstratýraǵa túsý kezinde shekteý engizý qabyldaý kórsetkishin edáýir tómendetip, talantty jastardyń shetelge ketýine ákelýi múmkin. Osyǵan baılanysty, búgingi tańda bakalavrıat beıini boıynsha shekteý jaǵyna qaraı qaıta qaraýdy orynsyz dep sanaımyz. Bul rette qabyldaý rásimderin jetildirý jáne irikteý krıterııleriniń ashyqtyǵyn kúsheıtý jónindegi jumys jalǵastyrylatyn bolady, - dedi ol.

Buǵan deıin qyrkúıek aıynda stýdentterdiń stıpendııasy qanshaǵa ósetinin jazǵan edik.