Magıstratýraǵa memlekettik grant: eń kóp suranysqa ıe bilim baǵyttary ataldy
ASTANA. KAZINFORM – Búgin 2026-2027 oqý jylyna arnalǵan magıstratýra granttaryn taǵaıyndaý jónindegi respýblıkalyq komıssııanyń otyrysy ótti. Bıyl konkýrsqa qatysý úshin 23 myńǵa jýyq ótinish qabyldandy, dep habarlaıdy QR Ǵylym jáne joǵary bilim mınıstrliginiń baspasóz qyzmeti.
Bıylǵy ótinishter sany ótken jylmen salystyrǵanda 3 myńǵa artyq. Bolashaq magıstranttar arasynda «Pedagogıkalyq ǵylymdar», «Aqparattyq-kommýnıkatsııalyq tehnologııalar», sondaı-aq «Injenerlik, óńdeý jáne qurylys salalary» baǵyttary eń joǵary suranysqa ıe boldy.
Komıssııa otyrysynda úmitkerlerdiń ótinishteri qaralyp, memlekettik bilim berý granttaryn bólý qoldanystaǵy erejelerge sáıkes konkýrs tártibimen júzege asyryldy. Komıssııa quramyna mınıstrlik, múddeli memlekettik organdar, bilim salasy kásipodaqtary, Ulttyq kásipkerler palatasy jáne qoǵamdyq uıym ókilderi endi.
Grant taǵaıyndaý konkýrsynyń nátıjeleri 25 tamyzǵa deıin Ǵylym jáne joǵary bilim mınıstrligi men Ulttyq testileý ortalyǵynyń resmı áleýmettik jelilerinde jarııalanady. Magıstranttardy joǵary oqý oryndaryna qabyldaý 2026 jyldyń 28 tamyzyna deıin júrgiziledi.
Osyǵan deıin magıstratýraǵa grant taǵaıyndaý konkýrsyna qatysý úshin qujat qabyldaý bastalǵany týraly jazdyq.
