Magıstratýraǵa qabyldaý emtıhany bastaldy: Bıyl 13 myń grantqa 43 myń adam úmitker

ASTANA. QazAqparat - Magıstratýraǵa túsýge arnalǵan keshendi testileý bastaldy. Ol 10 tamyzǵa deıin jalǵasady, dep habarlaıdy QazAqparat.

Ulttyq testileý ortalyǵynyń málimetinshe, jalpy 43 myńǵa jýyq ótinish kelip túsken.

Testileý ýaqyty, kúni jáne orny týraly aqparat KT-ǵa qatysýshylarǵa 18 shildede jeke kabınet jáne sms-habarlama arqyly habarlandy.

Aıta keteıik, magıstratýraǵa túsýshiler 13 myń memlekettik bilim grantyna úmitker bola alady.

Keshendi testileýdi tapsyryp bolǵannan keıin sertıfıkatty jeke kabınettiń «Meniń is-áreketim» bóliminde júktep alýǵa bolady.

Eń kóp tańdalǵan bilim berý baǵyttary - «Pedagogıkalyq ǵylymdar», «Injenerlik, óńdeý jáne qurylys salalary» jáne «Bıznes, basqarý jáne quqyq».

«Barlyq qalaýshylar úshin tirkeý bir jarym aı júrgizildi. Tirkelý barysynda oqýǵa túsýshi testileý ornyn ózi tańdady. Emtıhan búgin bastalyp, 10 tamyzǵa deıin jalǵasady», - deıdi Ulttyq testileý ortalyǵynyń dırektory Rýslan Emelbaev.

Grant konkýrsyna qujat 11-14 tamyz aralyǵynda qabyldanady.

Al grant ıegerleriniń tizimi 26 tamyzǵa deıin jarııalanady.