Magıstratýraǵa grant taǵaıyndaý konkýrsyna qatysý úshin qujat qabyldaý bastaldy

ASTANA. KAZINFORM – Búgin magıstratýraǵa bilim granttaryn taǵaıyndaý konkýrsyna qatysý úshin qujattar qabyldaý bastaldy. Bul týraly Ǵylym jáne joǵary bilim mınıstrliginiń baspasóz qyzmeti habarlady. 

Ol 18 tamyzǵa deıin (qosa alǵanda) joǵary oqý oryndarynyń qabyldaý komıssııalary, onyń ishinde vırtýaldy qabyldaý komıssııalary arqyly júzege asyrylady.

Barlyǵy 49 myńǵa jýyq adam magıstratýraǵa túsý úshin emtıhan tapsyrdy. Ǵylymı-pedagogıkalyq baǵyt boıynsha túsýshilerdiń 50%-y, beıindi baǵyt boıynsha 21%-y shekti ball jınady. Olar grant konkýrsyna qatysa alady.

Magıstratýrada oqýǵa arnalǵan bilim berý granttary keshendi testileý nátıjeleri boıynsha konkýrstyq negizde taǵaıyndalady.

— Grant konkýrsyna qujattardy qabyldaý 12-18 tamyz aralyǵynda joo-lardyń qabyldaý komıssııalary, onyń ishinde onlaın vırtýaldy komıssııalar arqyly júzege asyrylady. Bolashaq magıstranttarǵa qujattardy tapsyrýdyń yńǵaıly tásilin tańdaý múmkindigi beriledi, — delingen habarlamada.

Konkýrsqa qatysý úshin kelesi qujattardy tapsyrý qajet: jeke kýáliktiń kóshirmesi, joǵary bilimi týraly qujat (dıplom jáne qosymshasy); KT sertıfıkaty jáne shet tilin meńgergendigin rastaıtyn halyqaralyq sertıfıkattar (bar bolǵan jaǵdaıda).

Qujattardy tapsyrý kezinde oqýǵa túsýshi bilim berý baǵdarlamalarynyń bir tobyn jáne úsh joǵary oqý ornyn kórsete alady.

Magıstratýraǵa túsýshiler 13 myń memlekettik bilim grantyna úmitker bola alady.

Magıstratýraǵa bilim berý granty ıegerleriniń tizimi 25 tamyzǵa deıin Ǵylym jáne joǵary bilim mınıstrligi men Ulttyq testileý ortalyǵynyń resmı saıtynda jáne áleýmettik jelilerinde jarııalanady.

Bolashaq magıstranttardyń oqýǵa qabyldanýy 28 tamyzǵa deıin aıaqtalady.

Aıta ketelik magıstratýraǵa túsý úshin keshendi testileý kezinde 130 adamnyń nátıjesi joıylǵan edi.