Magıstratýraǵa grant taǵaıyndaý konkýrsyna qatysý úshin qujat qabyldaý bastaldy

Ǵylym jáne joǵary bilim mınıstrliginiń málimetinshe, barlyǵy 58 myńǵa jýyq adam magıstratýraǵa túsý úshin keshendi testileý tapsyrdy. Shekti ball jınaǵandar grant konkýrsyna qatysa alady. Magıstratýrada oqýǵa arnalǵan bilim berý granttary keshendi testileý nátıjeleri boıynsha konkýrstyq negizde taǵaıyndalady.

— Grant konkýrsyna qujattardy qabyldaý 12-18 tamyz aralyǵynda JOO-lardyń qabyldaý komıssııalary, onyń ishinde onlaın vırtýaldy komıssııalar arqyly júzege asyrylady, ıaǵnı bolashaq magıstranttarǵa qujattardy tapsyrýdyń yńǵaıly tásilin tańdaý múmkindigi beriledi, — delingen habarlamada.

Konkýrsqa qatysý úshin kelesi qujattardy tapsyrý qajet:

• jeke kýáliktiń kóshirmesi;
• joǵary bilimi týraly qujat (dıplom jáne qosymshasy); 
• KT sertıfıkaty jáne shet tilin meńgergendigin rastaıtyn halyqaralyq sertıfıkattar (bar bolǵan jaǵdaıda).

Qujattardy tapsyrý kezinde oqýǵa túsýshi bilim berý baǵdarlamalarynyń bir tobyn jáne úsh joǵary oqý ornyn kórsete alady.

Magıstratýraǵa túsýshiler 11 myńǵa jýyq memlekettik bilim grantyna úmitker bola alady.

Magıstratýraǵa bilim berý granty ıegerleriniń tizimi 25 tamyzǵa deıin QR Ǵylym jáne joǵary bilim mınıstriniń, QR Ǵylym jáne joǵary bilim mınıstrligi men Ulttyq testileý ortalyǵynyń resmı saıtynda jáne áleýmettik jelilerinde jarııalanady.

Bolashaq magıstranttardyń oqýǵa qabyldanýy 28 tamyzǵa deıin aıaqtalady.

Eske salaıyq, buǵan deıin magıstratýraǵa túsýge arnalǵan keshendi testileýdiń qorytyndycy shyqqanyn jazǵanbyz.