Magıstratýraǵa 6 142 adam ótinish berdi - BǴM
«Bıyl magıstýratýra jáne doktorantýraǵa qujattar Ulttyq testileý ortalyǵynyń aqparattyq júıesi arqyly qabyldanady. Magıstratýraǵa qujattar qabyldaý osy jyldyń 18 maýsymy men 15 shildesi aralyǵynda júrgiziledi. Doktorantýraǵa qujattar 3 shilde men 3 tamyz aralyǵynda bir aı qabyldanady.
Magıstratýraǵa keshendi testileý 20 shildeden 10 tamyzǵa deıin jalǵasady. Al doktorantýraǵa túsý emtıhany 4-20 tamyz aralyǵynda ótedi.
Keshendi testileý nátıjesi boıynsha magıstratýraǵa bilim berý granttaryn berý konkýrsy 11-15 tamyz aralyǵynda, doktorantýraǵa 22-24 tamyz aralyǵynda júrgiziledi.
Magıstratýra men doktorantýra boıynsha jalpy oqýǵa qabyldaý 28 tamyzda aıaqtalatyn bolady», - dedi ol mınıstrliktiń apparat jınalysynda.
Onyń atap ótýinshe, qazirgi ýaqytta magıstratýraǵa qujattar Ulttyq testileý ortalyǵy aqparattyq júıesi arqyly qabyldanyp jatyr.
«Úmitker óziniń elektrondy poshtasy arqyly tirkelip, málimetterin toltyrady. Budan ary magıstratýraǵa túsý baǵdarlamasy men joǵary oqý ornyn tańdaıdy. Magıstratýrada tek qana bir bilim berý baǵdarlamasy jáne 1 ǵana joǵary oqý orny tańdalady. Jalpy osy jyly keshendi testileý ótkizý formaty ózgerissiz qalady. 28 maýsymdaǵy aqparat boıynsha, qazirgi ýaqytta magıstratýraǵa 6 142 ótinish qabyldandy. Úmitkerlerge keshendi testileý ótkizý ýaqyty jáne orny 18 shildege deıin jeke kabınetterine joldanady. Testileý aıaqtalǵan soń úmitker 30 mınýt ishinde onlaın formatta apellıatsııaǵa bere alady», - dedi Ádilet Toıbaev.
