Magıstratýraǵa 20 myńnan astam ótinish tústi: grant nátıjeleri 23 tamyzda jarııalanady

ASTANA. KAZINFORM — Ǵylym jáne joǵary bilim mınıstrligi 2025-2026 oqý jylyna arnalǵan magıstratýranyń memlekettik bilim berý granttaryn taǵaıyndaý jónindegi Respýblıkalyq komıssııanyń jumysy aıaqtalǵanyn habarlaıdy. 

Respýblıkalyq komıssııa quramynda mınıstrliktiń, múddeli memlekettik organdardyń, bilim salasy kásipodaqtarynyń, QR Ulttyq kásipkerler palatasy jáne qoǵamdyq uıym ókilderi boldy.

Komıssııa otyrysynda úmitkerlerdiń ótinishteri qaralyp, memlekettik bilim berý granttaryn bólý qoldanystaǵy erejeler negizinde konkýrs tártibimen júzege asyryldy.

Bıylǵy jyly konkýrsqa qatysý úshin 20 myńnan astam ótinish qabyldandy, bul ótken jylmen salystyrǵanda 5 myńǵa artyq. Bolashaq magıstranttar arasynda eń suranysqa ıe bilim berý baǵyttary – «Pedagogıkalyq ǵylymdar», «Aqparattyq-kommýnıkatsııalyq tehnologııalar», «Injenerlik, óńdeý jáne qurylys salalary».

Grant taǵaıyndaý konkýrsynyń nátıjeleri 23 tamyz kúni QR Ǵylym jáne joǵary bilim mınıstriniń, Ǵylym jáne joǵary bilim mınıstrligi men Ulttyq testileý ortalyǵynyń resmı áleýmettik jelilerinde jarııalanady. 

Aıta ketelik magıstratýraǵa túsý úshin keshendi testileý kezinde 130 adamnyń nátıjesi joıylǵan edi.