Magıstratýra men doktorantýrada oqıtyndar áskerden bosatyla ma

ASTANA. KAZINFORM — Shetelde qashyqtan bilim alý áskerden jaltarýǵa negiz bola almaıdy. Bul týraly Qarýly kúshteri Bas shtaby Uıymdastyrý-jumyldyrý jumysy departamenti bastyǵynyń orynbasary Farhat Aıdarbaev ortalyq kommýnıkatsııalar qyzmetinde ótken baspasóz máslıhatynda málim etti. 

— Bilim alýdy jalǵastyrý úshin áskerı qyzmetke shaqyrýdy keıinge qaldyrý shet memleketterdiń oqý oryndarynda qashyqtan oqytýdy qoldaný arqyly bilim alatyn azamattarǵa berilmeıdi, — dedi ol.

Sondaı-aq, ol Farhat Aıdarbaev kúndizgi bólimde joǵary bilim alyp júrgen stýdentter áskerden qalaı bosatylatynyn túsindirdi.

— Bilim alýdy jalǵastyrý úshin áskerı qyzmetke shaqyrýdy keıinge qaldyrý bilim berýdiń árbir deńgeıi úshin bir ret beriledi. Joǵary oqý ornynan keıingi bilim alatyn azamatqa áskerı qyzmetke shaqyrýdy keıinge qaldyrý rezıdentýrada, magıstratýrada nemese doktorantýrada oqý kezinde tıisinshe bir ret beriledi.

Sonymen birge, bilim alýdy jalǵastyrý úshin áskerı qyzmetke shaqyrýdy keıinge qaldyrý rýhanı (dinı) bilim berý uıymdarynda bilim alatyn azamattarǵa, eger osy uıym Qazaqstan Respýblıkasynyń bilim berý salasyndaǵy zańnamasyna sáıkes bilim berý qyzmetin júzege asyrǵan jaǵdaıda beriledi, — dedi Qarýly kúshteri Bas shtabynyń ókili.

Buǵan deıin 28 tamyzda Qazaqstanda resmı túrde kúzgi áskerge shaqyrý naýqany bastalǵanyn jazǵan edik.