Magıstratýra emtıhanynyń alǵashqy kúninde 434 smartfon tárkilendi
10-15 tamyz aralyǵynda ótetin magıstratýra emtıhandary eldegi 27 bekette uıymdastyrylady. Bıyl elemiz boıynsha 30579 adam magıstratýra garantyna úmitker retinde ótinish tapsyrypty.
«Bıylǵy emtıhandarǵa QR Bilim jáne ǵylym mınıstri Ashat Aımaǵambetovtiń bastamasymen ashyqtyq pen adaldyqty qamtamasyz etý maqsatynda Sybaılas jemqorlyqqa qarsy is-qımyl agenttiginiń qyzmetkerleri, Adal Bilim jobalyq keńsesiniń ókilderi men qoǵam belsendilerinen turatyn arnaıy monıtorıngtik toptar baqylaýshylar retinde tartyldy. Óńirlerge Bilim jáne ǵylym mınıstrliginiń ókilderi jiberilip, apellıatsııalyq komıssııalar quryldy. Sonymen qatar, medıtsınalyq kómek kórsetý pýnkteri uıymdastyrylyp, testileý barysynda qaýipsizdik qamtamasyz etildi. Al erekshe muqtajdyǵy bar úmitkerlerge jeke kómekshiler men sýrdo-aýdarmashylar usynylatyn bolady», – delingen QR Sybaılas jemqorlyqqa qarsy is-qımyl agenttiginiń aqparatynda.
Agenttiktiń habaryna sensek, keshendi testileý 169 aýdıtorııada ótedi. Barlyq aýdıtorııalar uıaly baılanys sıgnaldaryn sóndirgish quraldarmen jáne beınebaqylaýmen qamtamasyz etilgen.
Nur-Sultan qalasy boıynsha testileý 3 pýnkte ótip jatyr. L.Gýmılev atyndaǵy EUÝ-da birinshi lekte 591 úmitker qatysyp jatyr. Testileýge kirgizý kezinde 434 smartfon tárkilendi.