Magıstratýra emtıhanyna ózge bireýdi kirgizbek bolǵandar oqýǵa túse ala ma

NUR-SULTAN. QazAqparat – Magıstratýraǵa túsý emtıhanyna óz ornyna bireýdi kirgizbek bolǵandarkelesi jyly qaıta tapsyra alady ma? Bul suraqqa Ulttyq testileý ortalyǵynyń dırektory mindetin atqarýshy Dıdar Smaǵulov jaýap berdi, dep habarlaıdy QazAqparat tilshisi.

«Magıstratýraǵa óz ornyna bireýdi kirgizbek bolǵandarǵa keleshekte qaıta túsýge múmkindik bola ma? Qazirgi zańnamaǵa sáıkes, múmkindik bolady. Biraq, men erejege ózgeris engizý kerek dep sanaımyn. Sebebi, kisi óz ornyna basqa adamdy jiberse, keleshekte jol bermeý kerek dep sanaımyn», - dedi Dıdar Smaǵulov búgin Ortalyq kommýnıkatsııalar ortalyǵynda ótken baspasóz máslıhatynda.

Onyń aıtýynsha, bógde adamdy kirgizgen úmitkerge keleshekte magıstratýraǵa tapsyrý quqyǵy múlde berilmeýi múmkin.

«Biraq, ol meniń oıym. Ereje qalaı qabyldanatynyn aıta almaımyn», - dedi ol.

Eske sala ketsek, buǵan deıin Dıdar Smaǵulov osy jyldyń 10-15 tamyzy aralyǵynda magıstratýraǵa túsý úshin ótkizilgen keshendi testileýdiń qorytyndysyn jarııalaǵan bolatyn.

Onyń aıtýynsha, 25 úmitker testileýge óz ornyna basqa bireýdi kirgizbek bolǵan.