Magıstratýra boıynsha memlekettik bilim granty ıegerleriniń esimderi belgili boldy

ASTANA. KAZINFORM – Magıstratýra boıynsha 2025-2026 oqý jylyna arnalǵan bilim granttary ıegerleriniń tizimi jarııalandy. Bul týraly Ǵylym jáne joǵary bilim mınıstrligi habarlady. 

Bilim berý granttary keshendi testileý (KT) nátıjeleri boıynsha konkýrstyq negizde taǵaıyndaldy.

Magıstratýra boıynsha bilim berý granttaryn taǵaıyndaý konkýrsyna ǵylymı-pedagogıkalyq baǵyt boıynsha 75 baldan, beıindik baǵyt boıynsha 30 baldan joǵary jınaǵan oqýǵa túsýshiler qatysty. Jalpy konkýrsqa 20 myńnan astam adam qatysty.

Bolashaq magıstranttardyń JJOKBU-na qabyldaý 2025 jyldyń 28 tamyzyna deıin (qosa alǵanda) júrgiziledi. 

2025-2026 oqý jylyna arnalǵan bilim berý granttary ıegerleriniń tizimi.

Aıta ketelik magıstratýraǵa túsý úshin keshendi testileý kezinde 130 adamnyń nátıjesi joıylǵan edi.