«Magıstraldyq sý qubyry» JShS-niń burynǵy basshysy 6 jyl 8 aıǵa sottaldy

Sot burynǵy «Magıstraldyq sý qubyry» JShS-niń bas dırektory, keıin «QazTransOıl» AQ-nyń kommertsııa jónindegi basqarýshy dırektory bolǵan Berik Salpekti 6 jyl 8 aıǵa bas bostandyǵynan aıyrdy.

Tergeý nusqasyna sáıkes, qylmystyq shema «Astrahan – Mańǵyshlaq» magıstraldyq sý qubyryn rekonstrýktsııalaý jobasyn iske asyrý barysynda uıymdastyrylǵan.

Aıyptaý tarabynyń málimetinshe, jobada paıdalanylǵan shynyplastık qubyrlar men basqa da materıaldardyń quny negizsiz ósirilip kórsetilgen. Sonymen qatar smetada kózdelgen, biraq is júzinde oryndalmaǵan jumystar oryndaldy dep rásimdelip, qabyldaý aktilerine engizilgen. Sonyń saldarynan memleketke 6,4 mlrd teńgeden astam zalal keltirilgen.

Sot Berik Salpekti Qazaqstan Respýblıkasy Qylmystyq kodeksiniń 28-babynyń 3-bóligi (qylmysty uıymdastyrýshy) jáne 190-babynyń 4-bóliginiń 2-tarmaǵy (asa iri mólsherde jasalǵan alaıaqtyq) boıynsha kináli dep tanydy. Oǵan 6 jyl 8 aı merzimge bas bostandyǵynan aıyrý jazasy taǵaıyndaldy. Sondaı-aq ómir boıyna memlekettik qyzmette, sýdıa laýazymynda, jergilikti ózin-ózi basqarý organdarynda, Ulttyq bankte, qarjy naryǵyn retteý jáne qadaǵalaý organdarynda, memlekettik uıymdar men kvazımemlekettik sektor sýbektilerinde qyzmet atqarý quqyǵynan aıyryldy.

Úkimge sáıkes, Berik Salpektiń bank shotyndaǵy 30,1 mln teńgeden astam qarajaty men avtokóligi memleket kirisine tárkilenedi.

- Sonymen qatar, sot 12 mıllıon teńge kólemindegi zalaldyń tolyq dáleldenbegenin anyqtady. Osyǵan baılanysty azamattyq talap ishinara qanaǵattandyryldy. Zańsyz túzetýlerge qatysty 6 mıllıard teńgeden astam soma boıynsha talap qanaǵattandyryldy. Sot talqylaýy barysynda qubyrdyń túri zańsyz ózgertilgeni anyqtaldy. Sondyqtan osy bóligi boıynsha talap-aryz qanaǵattandyryldy. Sondaı-aq, sot tergeýi barysynda dáleldengen múlikterge salynǵan tyıymdardyń bir bóligi memleket kirisine óndirildi, al qalǵan bóligi zańdy ıelerine qaıtaryldy. Budan bólek, sottalýshylarǵa tıesili jáne azamattyq talapty qamtamasyz etý úshin qajet ózge de múlikterge salynǵan tyıym saqtaldy,-dedi №2 qalalyq sotynyń sýdıasy Nurtas Bólekbaev.

Osy is boıynsha aıyptalǵan Asqar Kúltýmıev te Qazaqstan Respýblıkasy Qylmystyq kodeksiniń 190-babynyń 4-bóliginiń 2-tarmaǵy (asa iri mólsherde jasalǵan alaıaqtyq) boıynsha kináli dep tanylyp, 6 jylǵa bas bostandyǵynan aıyryldy. Sonymen qatar oǵan ómir boıyna memlekettik jáne kvazımemlekettik sektorda qyzmet atqarýǵa tyıym salyndy. Onyń avtokóligi tárkilenedi.

«Alıansstroıgrýpp» JShS-niń qarjylyq keńesshisi Aslan Işanov ta osy bap boıynsha kináli dep tanylyp, 6 jylǵa sottaldy. Oǵan qosa bes jyl merzimge kommertsııalyq jáne ózge uıymdarda basshylyq ári materıaldyq jaýapty qyzmetterdi atqarý quqyǵynan aıyryldy. Sot onyń birneshe avtokóligin, Astana qalasyndaǵy páterin, avtoturaǵyn jáne kommertsııalyq maqsattaǵy jyljymaıtyn múlkin memleket kirisine tárkileý týraly sheshim shyǵardy.

«Eýrazııalyq faktorıng kompanııasy» JShS-niń qarjy dırektory Arman Maskenov te Qazaqstan Respýblıkasy Qylmystyq kodeksiniń 190-babynyń 4-bóliginiń 2-tarmaǵy boıynsha kináli dep tanylyp, 6 jylǵa bas bostandyǵynan aıyryldy. Sondaı-aq bes jyl boıy kommertsııalyq jáne ózge uıymdarda basshylyq ári materıaldyq jaýapty qyzmetterdi atqarýyna tyıym salyndy. Úkimge sáıkes, onyń Almaty men Astana qalalaryndaǵy birneshe páteri, turǵyn emes ǵımarattary, avtoturaq oryndary, jer ýchaskesi, arnaıy tehnıkasy men avtokólikteri memleket kirisine tárkilenedi.

Atalǵan is boıynsha «Sala» JShS-niń quryltaıshysy Nurjan Ahanov ta Qylmystyq kodekstiń 28-babynyń 5-bóligi (qylmysqa kómektesýshi) jáne 190-babynyń 4-bóliginiń 2-tarmaǵy (asa iri mólsherde jasalǵan alaıaqtyq) boıynsha kináli dep tanyldy. Sot oǵan 5 jyl merzimge bas bostandyǵynan aıyrý jazasyn taǵaıyndady. Sonymen qatar 5 jyl boıy kommertsııalyq jáne ózge uıymdarda basshylyq ári materıaldyq jaýapty qyzmetterdi atqarý quqyǵynan aıyryldy.

Sot úkimimen aıypty dep tanylǵandar jazasyn qylmystyq-atqarý júıesiniń ortasha qaýipsizdik mekemesinde óteıdi. Buǵan deıin olarǵa qatysty qoldanylǵan eshqaıda ketpeý jáne tıisti minez-qulyq týraly qolhat túrindegi bultartpaý sharasy ózgertilip, sot zalynda qamaýǵa alyndy.Jaza óteý merzimi 2026 jylǵy 7 tamyzdan bastap esepteledi. Úkim zańdy kúshine engenge deıin qamaýda bolǵan árbir kún jaza merzimine 1 kúnge – 1,5 kún retinde esepteledi.

Sot sondaı-aq jábirlenýshi – «Qazmunaıgaz» ulttyq kompanııasynyń azamattyq talabyn ishinara qanaǵattandyrdy. Sottalǵandardan kompanııanyń paıdasyna 6 mlrd 465 mln teńge óndiriletin boldy.

Buǵan deıin terrorızmdi nasıhattaǵan aqtóbelik 8 jylǵa bas bostandyǵynan aıyrylǵany jóninde jazdyq.