Magerramov mınıstrge bir kúnin múgedek balalarǵa arnaýdy usyndy
«Bizdiń depýtattyq saýal múgedek balalarǵa qatysty bolyp otyr. Qazaqstanda múmkindigi shekteýli jandarǵa qajetti kóptegen sharalar jasalýda, alaıda olarǵa baılanysty eleýli problemalar da barshylyq», - dep toqtaldy depýtat.
Osy oraıda ol erekshe qajettilikterdi talap etetin balalarǵa arnalǵan stomatologııalyq emdeý úlken máselelerdiń biri ekenin atap ótti. Memlekettik emhanalardyń keıbirinde osyndaı em-dom jasalmaıdy, sondaı-aq emdeýdiń sapasyna ata-analardan kóp shaǵym túsýde. Al jeke klınıkalarda bul sharalar tym qymbat bolyp otyr.
Budan bólek Megerram Magerramov múgedek jandarǵa arnalǵan arbasha da kúrdeli problemalardyń biri bolyp sanalatyndyǵyn sóz etti.
«Mınıstr myrza, eger de bir kúnińizdi osy máselege arnap, avtokólikten múgedekter arbashasyna otyryp, onymen qoǵamdyq kólikte qalany aralap kórseńiz, qordalanǵan problemany jaqsy túsiner edińiz. Osy oraıda turǵyn úı keshenderi men memlekettik mekemelerdiń pandýstaryna shyǵyp kórińiz. Atalǵan usynys «qaljyń aıtý» nıetinen týyndap otyrǵan joq, bul múgedek balalalardyń aldynda turǵan naqty problama. Onyń ústine ótken ǵasyrdyń úlgisindegi aýyr ári qolaısyz arbalar múgedek balalarǵa qolaısyzdyq týdyrýda», - dedi depýtat Densaýlyq saqtaý mınıstrine qaratyp aıtqan sózinde.
Sonymen qatar ol múgedek jetkinshekterge qatysty ózge de problemalardyń arasynda ońaltýdyń tómen kórsetkishi baıqalyp otyrǵanyn jetkizdi.
«Múmkindigi shekteýli balalarǵa em-dom jasaý sharalaryna da shaǵymdar kóptep túsýde», - dep atap ótti Magerramov.