MAGATE ýran máselesine baılanysty Qazaqstanǵa tolyqtaı senimmen qaraıdy - Energetıka jáne mıneraldyq resýrstar vıtse-mınıstri
ASTANA. Qańtardyń 12-si. QazAqparat /Qanat Mámetqazyuly/ - Atom energııasy jónindegi halyqaralyq agenttigi (MAGATE) ýran máselesine baılanysty Qazaqstanǵa tolyqtaı senimmen qaraıdy.
Búgin QR Parlamenti Májilisi Halyqaralyq ister, qorǵanys jáne qaýipsizdik komıtetiniń keńeıtilgen otyrysy barysynda depýtattar saýalyna jaýap bergen QR Energetıka jáne mıneraldyq resýrstar vıtse-mınıstri Áset Maǵaýov osylaı málim etti, dep habarlaıdy QazAqparat.
«Kúni keshe MAGATE-niń sarapshylarymen kezdesý bolǵan edi. Onda BAQ-ta jarııalanǵan Qazaqstannyń ýran kelisimi jaıynda sóz boldy. Osyǵan baılanysty, MAGATE ýran máselesine qatysty Qazaqstanǵa tolyqtaı senimdi ekendigin atap ótti. Degenmen de, birqatar BAQ-ta jarııalanǵan Qazaqstannyń Iranǵa ýran satatyn áldebir kelisimge qatysy barlyǵy týraly MAGATE sarapshylary eshqandaı da resmı málimdeme jasamaıtyndyǵyn atap ótti. Óıtkeni, MAGATE sarapshylary ınternet kózderi arqyly jarııalana beretin bundaı negizsiz qaýesetke sonshalyqty nazar aýdarmaıtynyn, ondaı jalǵan aqparlardy resmı joqqa shyǵarýmen aınalysa bermeıtinin, onda jumystyń barlyǵy tek osyndaı sharýaǵa aýysyp ketetinin málimdegen», dedi Á. Maǵaýov.
