MAGATE Soltústik Koreıada ýran baıytatyn jańa nysan bar ekenin habarlady
ASTANA. KAZINFORM – Koreı Halyq Demokratııalyq Respýblıkasy (KHDR) Ionbendegi ıadrolyq keshende ýran baıytatyn jańa nysan saldy, dep habarlaıdy DW.
Atom energııasy jónindegi halyqaralyq agenttiktiń (MAGATE) baǵalaýynsha, jańa nysanǵa gaz tsentrıfýgalarynyń 28 kaskadyna deıin ornalastyrýǵa bolady. Bul týraly MAGATE-niń 28 tamyzdaǵy baıandamasynda aıtylǵan. Onyń mazmuny sársenbi, 9 qyrkúıekte halyqaralyq BAQ-ta jarııalandy.
Budan bólek, agenttik Phenıanǵa jaqyn ornalasqan Kansondaǵy keńeıtilgen ýran baıytý nysanynyń jumysyn bastaǵanyna qatysty belgiler bar ekenin málimdedi. MAGATE ınspektorlary 2009 jyldan beri Soltústik Koreıaǵa kire almaıtyndyqtan, agenttik Phenıannyń qyzmetin spýtnıktik sýretter men KHDR memlekettik BAQ-tary jarııalaǵan fotosýretterdi qosa alǵanda, ashyq derekkózderdegi aqparatty taldaý arqyly baqylap otyr.
Agenttik málimetinshe, Ionbendegi eki qabatty jańa ǵımarat keshen aýmaǵyndaǵy ýran baıytatyn ekinshi nysan bolyp otyr. Mamandar mundaı qorytyndyǵa qurylys kezeńindegi spýtnıktik sýretterdi KHDR basshysy Kım Chen Ynnyń maýsymdaǵy sapary kezinde túsirilgen fotosýrettermen salystyrý arqyly kelgen. Soltústik Koreıa BAQ-tary jarııalaǵan kadrlarda ǵımarattyń eki qabatynda da ornalasqan gaz tsentrıfýgalarynyń kaskadtary kórinedi. MAGATE baǵalaýynsha, nysanǵa osyndaı 28 kaskadqa deıin ornalastyrýǵa bolady.
Baıandamada sondaı-aq Kansondaǵy keńeıtilgen ýran baıytý nysanynda jumystar qańtar aıynda bastalýy múmkin bolǵany aıtylǵan. Ol jerde qosymsha nysan 2024 jyly salynǵan. Agenttik bul derekter Soltústik Koreıanyń ıadrolyq ınfraqurylymy birden birneshe nysanda keńeıip jatqanyn kórsetedi dep sanaıdy.
MAGATE bas dırektory Rafael Grossı halyqaralyq qaýymdastyqtyń KHDR-dyń ıadrolyq baǵdarlamasynyń damýyna alańdap otyrǵanyn málimdedi.
— Kanson men Ionbendegi baıytý qondyrǵylarynyń qazirgi ýaqytta jumys istep turýy, sondaı-aq KHDR-dyń qarý-jaraqqa arnalǵan ıadrolyq materıal óndirisin odan ári keńeıtip jatqany týraly aqparat úlken alańdaýshylyq týǵyzady, — dep atap ótti ol.
MAGATE Soltústik Koreıanyń ıadrolyq saladaǵy qyzmeti Phenıanǵa ıadrolyq qarý men ballıstıkalyq zymyrandarǵa qatysty baǵdarlamalardy damytýǵa tyıym salatyn BUU Qaýipsizdik Keńesiniń qararlaryn buzatynyn eske saldy.
Buǵan deıin MAGATE basshysy Soltústik Koreıanyń ıadrolyq qarý áleýetin arttyrǵany týraly habarlaǵan bolatyn.
