MAGATE sarapshylary Qazaqstanǵa ıadrolyq nysandardy tekserý maqsatynda keledi

Bul týraly búgin QR Parlamenti Májilisiniń jalpy otyrysynda QR Energetıka jáne mıneraldyq resýrstar vıtse-mınıstri Áset Maǵaýov málim etti, dep habarlaıdy QazAqparat.

«Aǵymdaǵy qańtar-aqpan aılarynda Qazaqstanǵa MAGATE sarapshylarynyń kelýi josparlanyp otyr. Sarapshylardyń bundaı jyl saıynǵy saparynyń basty maqsaty - Qazaqstannyń ıadrolyq nysandaryn tekserý. Buǵan deıingi MAGATE sarapshylarynyń tekserýleri barysynda, ıaǵnı ótken on jylda Qazaqstanǵa atalǵan uıym tarapynan eshbir eskertý bolǵan emes», dedi Energetıka jáne mıneraldyq resýrstar vıtse-mınıstri Áset Maǵaýov.

Sonymen birge, vıtse-mınıstr Qazaqstannyń ýran máselesi boıynsha eksporttyq baqylaý sharalaryna toqtalyp ótti. Onyń aıtýynsha, elimizdiń ýran eksporty qyzmettiń lıtsenzııalanǵan túrine jatady. Al bundaı eksporttyq sharalar úshin qazaqstandyq kásiporyndar memlekettik lıtsenzııa alýlary shart. «Qazaqstannyń ýrany negizinen ıadrolyq derjava bolyp tabylmaıtyn elderge shyǵarylady. Sonymen birge, sońǵy paıdalanýshynyń arnaıy sertıfıkaty bolǵan jaǵdaıda ǵana otandyq ýran syrtqa shyǵarylady. Sertıfıkat - ýran alýshy memlekettiń ýrandy beıbit maqsatta paıdalanatynyn jáne Qazaqstannyń ruqsatynsyz úshinshi elderge shyǵara almaıtyndyǵyn bildiredi. Qazaqstannyń ýrany jetkiziletin memleketter týraly arnaıy tizim bar. Bizdiń bul baǵyttaǵy aqparatymyz ashyq. MAGATE tarapynan da ol boıynsha esh másele bolǵan emes», dedi vıtse-mınıstr.