MAGATE ókilderi AES qurylysynyń barysyn baqylaý úshin bıyl Ózbekstanǵa barady
TAShKENT. KAZINFORM – Atom energııasy jónindegi halyqaralyq agenttik (MAGATE) ókilderi Ózbekstanda salynyp jatqan AES qurylysyn baqylaý úshin ústimizdegi jyldyń ekinshi jartysynda kórshiles elge keledi, dep habarlaıdy Kazinform agenttiginiń Tashkenttegi menshikti tilshisi.
Bul týraly Parıjde ótken II Halyqaralyq Atom energııasy sammıti aıasynda kezdesken Uzatom agenttiginiń dırektory Azım Ahmedhadjaev pen Atom energııasy jónindegi halyqaralyq agenttiktiń bas dırektory Rafael Grossı ýaǵdalasty.
Sondaı-aq, taraptar Jızaq oblysynyń Farısh aýdanynda boı kóterip jatqan eldegi alǵashqy AES alańynda alǵashqy beton quıý jumystarynyń bastalýyn talqylady.
MAGATE basshysy jobanyń mańyzdylyǵyna toqtalyp, shaǵyn jáne úlken qýatty reaktorlardy bir keshenge ıntegratsııalaý josparyna erekshe nazar aýdardy.
— Kezdesý qorytyndysy boıynsha Rafael Grossı uıymnyń Ózbekstannyń ıadrolyq baǵdarlamasyn iske asyrý umtylysyna qoldaý kórsetý jalǵasatynyn atap ótti. Sonymen qatar, Azım Ahmedhadjaev ony alǵashqy beton quıý rásimine qatysýǵa shaqyrdy, - delingen Uzatom agenttigi taratqan habarlamada.
Eske salaıyq, taıaýda Belarýs prezıdenti Ózbekstannyń AES salý jobasyn iske asyrýda strategııalyq seriktes bolýǵa daıyn ekenin málimdedi.
Buǵan deıin habarlaǵanymyzdaı, Ózbekstanda salynyp jatqan AES Jızaq, Samarqand jáne Naýaı oblystaryn elektr energııasymen qamtamasyz etpek.
Sondaı-aq, taıaýda Ózbekstanda atom elektr stantsııasy qurylysynyń birinshi kezeńi bastalǵanyn jazyp edik.
23 jeltoqsanda Ózbekstanda AES qurylysy boıynsha qoǵamdyq tyńdaý ótti.
