MAGATE mamandary Astanada atom energetıkasy salasyndaǵy lıtsenzııalaý máselesin talqylaıdy

ASTANA. KAZINFORM – Atom energetıkasy jónindegi halyqaralyq agenttik (MAGATE) sarapshylar Qazaqstanda atom energetıkasyn salasyn zańnama arqyly retteý máselesin talqylaý úshin Astanada jınaldy.

«Qazaqstan atom elektr stansalary» JShS uıymdastyrǵan bes kúndik is-shara kezinde atom energetıkasy salasyndaǵy lıtsenzııalaý, ınspektsııalyq baqylaý, sertıfıkattaý, AES qurylysynyń standarttaryn bekitý halyqaralyq tájirıbede qalaı iske asatyny talqylanyp, Qazaqstannyń ustanymy pysyqtalmaq. 

Energetıka mınıstrligi Atom energetıkasy jáne ónerkásip departamenti Atom jobalaryn damytý basqarmasynyń basshysy Qanat Tuıaqbaevtyń aıtýyna qaraǵanda, bul jıyn atom energetıkasyna jańadan den qoıyp jatqan Qazaqstannyń mamandaryna álemdegi úzdik tájirıbelerdiń erekshelikterin jete túsinýge múmkindik ashady. 

– Bul mıssııa Qazaqstanǵa atom energetıkasyn retteý úshin qandaı júıe tabysty ári senimdi bolatynyn anyqtaýǵa múmkindik beredi. Bul sala endi ǵana qolǵa alynyp jatqandyqtan bizdegi retteý negizderi durys bolǵany mańyzdy. AES jobalarynyń aıasyndaǵy lıtsenzııalaý, ınspektsııalyq qadaǵalaý, ruqsattar berý máselelerine basa nazar aýdarsaq dep otyrmyz. Buǵan deıin MAGATE-men birge ótkizgen sharalardan aıyrmashylyǵy basym baǵyt retinde energetıkalyq jobalar alynǵanynda, - deıdi ol. 

Mınıstrlik ókili Qazaqstan AES máselesinde halyqaralyq agenttik ustanymdary múltiksiz eskerýge nıetti ekenin atap ótti. 

– Qazaqstan ári qaraı da MAGATE-niń bastamalaryn ustanyp, atom energetıkasyn adamzat ıgiligi jolynda ǵana paıdalanýǵa kúsh salady, - deıdi Qanat Tuıaqbaev. 

Bes kúndik jıyn aıasynda taqyryptyq dárister, jumys sessııalary, talqylaýlar ótpek. 

Eske salsaq, ótken aptada dál osyndaı formatpen Qazaqstan aýmaǵynda AES salynatyn oryndardy tańdaý tásilderine arnalǵan semınar ótken bolatyn.