MAGATE Irannyń ýrandy baıytýdy toqtatqanyn rastady
ASTANA. 20 qańtar. QazAqparat - Halyqaralyq atom energııasy boıynsha agenttigi (MAGATE) Tehran ýrandy baıytýdy 20 paıyzǵa deıin toqtatý týraly jenevalyq kelisimniń talabyn oryndaýǵa kiriskenin rastady.
Sheteldik BAQ-tardyń málimetine qaraǵanda, MAGATE ınspektorlary qazirgi kezde Iranda saparmen júr.
Kelisimge sáıkes, Iran 20 qańtardan bastap ýrandy baıytýdy 20 paıyzǵa deıin toqtatýdy mindetke alyp otyr. Osyǵan jaýap retinde AQSh pen EO Irannyń 4,2 mlrd. dollar kólemindegi tosqaýyl qoıylǵan sheteldik esepshottaryn qol jetimdi etýge kelisti. Alǵashqy transhty Iran aqpanda alady.
Sonymen qatar Iran jaǵy ýrandy baıytý úshin jańa tsentrıfýgalardy ornalastyrýdan bas tartyp, ózderiniń ıadrolyq nysandaryna halyqaralyq sarapshylardy kirgizýge jáne qarýǵa negizdelgen plýtonııdi óndirýge tehnıkalyq turǵyda qaýqarly ıadrolyq reaktordyń qurylysyn toqtatýǵa kelisti.
Óz kezeginde bul elge qatysty ekonomıkalyq sanktsııalar birshama jeńildetiletin bolady.
