MAGATE Iran men AQSh arasyndaǵy ıadrolyq kelissózderdi qaıta bastaýǵa kómektesýge daıyn
ASTANA. KAZINFORM – BUU-nyń ıadrolyq qadaǵalaý organynyń basshysy taraptar «óte mańyzdy kezeńde» turǵanyn málimdedi, dep habarlaıdy Kazinform agenttiginiń menshikti tilshisi.
Halyqaralyq atom energııasy jónindegi agenttiktiń (MAGATE) bas dırektory Rafael Grossı beısenbi kúni uıym Iran men AQSh arasyndaǵy ıadrolyq kelissózderdi qoldaýda belsendi ról atqarýǵa daıyn ekenin málimdedi.
Ol Tegeranda Irannyń joǵary laýazymdy tulǵalarymen, sonyń ishinde syrtqy ister mınıstri Abbas Arakchı men Irannyń atom agenttiginiń basshysy Mohammad Eslamımen kezdeskennen keıin, ýrandy baıytý deńgeıine qatysty halyqaralyq qaýymdastyqtyń alańdaýshylyǵy artqan jaǵdaıda, dıplomatııalyq kúsh-jigerdiń mańyzdylyǵyn atap ótti.
— Biz bul kelissózderdiń óte mańyzdy kezeńinde turmyz. Ýaqytymyzdyń az ekenin bilemiz, sondyqtan osy protseske járdemdesý úshin osynda keldim, — dedi Grossı Eslamımen birlesken baspasóz máslıhatynda.
Onyń aıtýynsha, MAGATE dıplomatııaǵa múmkindik beretin keńistikti saqtaý úshin kúsh salýdy jalǵastyrady.
— Kelisimge qol jetkizý ońaı protsess emes, biraq biz tabysqa jetýge nıettimiz, — dedi ol.
Grossıdiń Tegeranǵa sapary osy senbi kúni Rımde Omannyń deldaldyǵymen ótetin Iran men AQSh arasyndaǵy kelissózderdiń ekinshi raýndynyń qarsańynda júzege asty. Bul kelissózder bir apta buryn ótken, AQSh-tyń 2018 jyly ıadrolyq kelisimnen shyqqanynan bergi eń joǵary deńgeıdegi kezdesý jalǵasy bolmaq.
Intensive day of discussions in Tehran today with Iran’s Vice President and Head of @aeoi_ir Mohammad Eslami, and Deputy Foreign Minister @Gharibabadi. pic.twitter.com/3DEbAQe86C
— Rafael Mariano Grossi (@rafaelmgrossi) April 17, 2025
Irannyń syrtqy ister mınıstri Abbas Arakchı AQSh-tyń arnaıy ókili Stıv Ýıtkoffpen ótken alǵashqy kelissózder raýndyna qatysqannan keıin, Rafael Grossımen bolǵan kezdesýdi «paıdaly» dep atap, agenttik Irannyń ıadrolyq máselesin beıbit jolmen sheshýde «sheshýshi ról» atqarady degen úmitin bildirdi.
Sonymen qatar ol MAGATE-niń jumysyna saıası yqpal etýge jol bermeý qajettigin eskertip, qazirgi kelissózderdi buzýǵa tyrysyp jatqan kúshterdiń bar ekenin atap ótti.
Buǵan deıin, aqpan aıynda MAGATE Iran ýranynyń baıytylý deńgeıine — 60%-ǵa jetýine baılanysty «aıtarlyqtaı alańdaýshylyq» bildirgen baıandama jarııalaǵan. Bul kórsetkish ıadrolyq qarý jasaýǵa jaqyn deńgeı sanalady. Al Tegeran óz ıadrolyq baǵdarlamasynyń tek beıbit maqsatty kózdeıtinin alǵa tartyp otyr.
Tegeran men Vashıngton arasyndaǵy kelissózder AQSh prezıdenti Donald Tramptyń qatań rıtorıkasy aıasynda ótip jatyr. Ol dıplomatııa sátsiz aıaqtalǵan jaǵdaıda Iranǵa qatysty áskerı stsenarııdi joqqa shyǵarmaıtynyn málimdegen.
Rafael Grossı Iranǵa sapar shylardyń aldynda frantsýzdyń Le Monde gazetine bergen suhbatynda Tegerannyń ıadrolyq qarýǵa qol jetkizýge «jaqyn» ekenin aıtqan bolatyn.
Beısenbi kúni Iran syrtqy ister mınıstri Hameneı atynan arnaıy joldaýmen Máskeýge bardy. Al ótken senbide Omanda Irannyń ıadrolyq baǵdarlamasyna qatysty alǵashqy kelissózder raýndy ótti.