MAGATE bankiniń ashylýy Qazaqstanda atom salasyndaǵy joǵary sapany bildiredi
ASTANA. QazAqparat - Qazaqstan beıbit atom energııasyna jaýapty MAGATE-niń senimdi seriktesine aınaldy. Bul týraly búgin Qazaqstan Respýblıkasynda Atom energııasy jónindegi halyqaralyq agenttiktiń Tómen baıytylǵan ýran banki ǵımaratyn saltanatty ashý rásiminde Elbasy Nursultan Nazarbaev málim etti, dep habarlaıdy QazAqparat.
«Jahandyq ekonomıkalyq ómir túbegeıli ózgerýde, alaıda eń aldyńǵy qatarly tsıfrlyq ekonomıkaǵa da energııa qajet, ıaǵnı kóp energııa kerek bolady. Dástúrli energııa kózderine qaraǵanda, ýranda mıllıondaǵan ese energııanyń úlken kontsentratsııasy bar ekenin eske salǵan jón. Sondyqtan da ıadrolyq energetıka balamaly bolyp tabylady ári basqalaryna qaraǵanda tıimdirek»,-dedi Memleket basshysy.
Osy oraıda Prezıdent qazirgi kezde álemde 51- den astam atom elektr stansasy salynyp jatqanyn, al 2030 jylǵa qaraı 500-ge tarta AES josparlanyp otyrǵanyn atap ótti.
«Bolashaqta ıadrolyq energetıkanyń jańǵyrtylýy eleýli. Sondyqtan tómen baıytylǵan ýran bankin ornalastyrý úshin Qazaqstannyń tańdalýy bizdiń eldiń atom salasyndaǵy sapany bildiredi. Esterińizge sala keteıin, túrli esepteýlerge qaraǵanda, Qazaqstanda álem boıynsha ýran qorynyń 30 paıyzǵa deıingi úlesi shoǵyrlanǵan. Búginde biz ýran óndirýshi iri elderdiń birimiz jáne álemdik energetıkada mańyzdy ról atqarýǵa daıynbyz»,-dedi Memleket basshysy.
