MAGATE AQSh-tyń soqqysynan keıin shuǵyl jıyn ótkizbekshi
ASTANA. KAZINFORM – AQSh-tyń Irannyń ıadrolyq nysandaryna jasaǵan shabýylynan keıingi shıelenis aıasynda MAGATE Bas dırektory Rafael Grossı Dırektorlar keńesiniń shuǵyl otyrysyn dúısenbi kúni ótkizý týraly sheshim qabyldady. Bul týraly Kazinform agenttiginiń menshikti tilshisi habarlady.
Halyqaralyq atom energııasy agenttigi (MAGATE) amerıkalyq áýe shabýylynan keıin Irannyń negizgi ıadrolyq nysandarynyń mańaıynda radıatsııalyq deńgeıdiń joǵarylaýyn tirkemegenin rastady.
— Irandaǵy úsh ıadrolyq nysanǵa jasalǵan shabýyldan keıin agenttik qazirgi ýaqytta bul nysandardyń syrtynda radıatsııalyq fonnyń artqanyn baıqamady, — delingen MAGATE-niń áleýmettik jelidegi X paraqshasynda jarııalanǵan málimdemesinde.
Bul málimdeme AQSh prezıdenti Donald Tramptyń Fordo, Isfahan jáne Natanzdaǵy ıadrolyq nysandardyń «tolyǵymen joıylǵany» týraly aıtqan sózinen birneshe saǵat ótken soń jarııalandy.
Sońǵy kúnderi Tegeran men Tel-Avıv arasyndaǵy qaqtyǵystyń ýshyǵýyna baılanysty Iran tarapy MAGATE men onyń Bas dırektory Rafael Grossıdi synǵa alyp, agenttikti «qaıshylyqqa toly málimdemeler jasap, Izraıldiń áskerı naýqanynyń bastalýyna sebepker boldy» dep aıyptady.
Eske sala keteıik, Irannyń Atom energetıkasy jónindegi agenttigi AQSh-tyń Natanz jáne Fordo qalalaryndaǵy zaýyttarǵa jasaǵan shabýylyna qaramastan, eldiń ýran baıytý baǵdarlamasy toqtatylmaıtynyn málimdedi.