Maǵan jalǵan psıhologter men «koýchtar» ústinen túsetin shaǵym kóbeıip ketti - Prezıdent

BÝRABAI. KAZINFORM – Prezıdent Qasym-Jomart Toqaev Býrabaıda ótip jatqan Ulttyq quryltaıdyń IV otyrysynda quqyq qorǵaý organdaryn jalǵan psıhologtar men «koýchtardyń» áreketine jiti baqylaý ornatýdy tapsyrdy.

- Quryltaı músheleri taǵy bir jaıtqa alańdaýshylyq bildirip otyr. Sońǵy kezde el ishinde túrli alaıaqtyq áreketter jıilep barady. Teris pıǵyldy adamdar qaıyrymdylyqqa dep aqsha jınap, ony jeke basynyń paıdasyna jaratady. Sondaı-aq kóp adam ınternet-alaıaqtardan zardap shegýde, - dedi Qasym-Jomart Toqaev.

Memleket basshysy quryltaıda sóz alǵan zańger Aıgúl Orynbektiń usynystaryna qoldaý bildirdi.

- Budan bólek, qazir jurtqa aqyl aıtyp aqsha tabatyn jalǵan psıhologtar men «koýchtar» kóbeıip ketti. Olarǵa senip, aldanyp qalǵandar kóp. Maǵan bul týraly kóptegen shaǵym túsip jatyr. Bul máseleni Quryltaı múshesi Aıgúl Orynbek durys kóterip otyr. Jaýapty organdar bul máseleni de nazarǵa alýǵa tıis, - dedi Prezıdent.

Aıta ketý kerek, quryltaıdyń paneldik sessııalary keshe bastalǵan. Ol sektsııalardyń taqyryptary azamattyq qoǵam, mádenıet, óner, rýhanııat, bilim jáne ǵylym, áleýmettik-ekonomıkalyq damý máselelerin qamtydy. 

Buǵan deıin Mádenıet jáne aqparat mınıstri Aıda Balaeva jıynnyń alǵashqy kúninde aıtylǵan usynystar týraly málimet bergen edi. 

Al Ǵylym jáne joǵary bilim mınıstri Saıasat Nurbek Ulttyq quryltaıdyń 4-otyrysy aıasynda Qazaqstan tarıhynyń jańa akademııalyq basylymyn ázirlenetinin aıtty.

2022 jyly Ulttyq quryltaı alǵash jandanǵannan beri eldegi áleýmettik-ekonomıkalyq máseleler sheshim taýyp keledi. Jyl ótken saıyn taqyryp aıasy keńidi, aıtylatyn salmaqty oı ulǵaıdy.