Maǵan otqa jaǵatyn kitap berińiz

Kitaphananyń keleshek taǵdyry ne bolady? Qashan oqyrmanǵa esigin ashady? Ol jaǵy da beımálim bolyp tur. Kitaphananyń ashylatynyn estigen jandar alǵan kitaptaryn qaıta tapsyraıyn dese, kitaphana esigi jabyq turǵandyqtan irgedegi dúkenderge tastap ketip jatyr. Kitaphana esigine qulaqtandyrý da ilinbegen, dep jazady «Almaty aqshamy basylymynyń tilshisi Ótesh Óteýliuly.

- Qańtar aıynda kelgenimde kitaptardyń talan-taraj bolyp jatqanyn kórgende júregim aýyrǵan. Ǵımarat ishin tez arada bosatý kerek bolyp, edende shashylǵan kitaptyń ústine aıaǵymen shyǵyp, joǵarǵy sóredegi kitaptardy alyp jatqan jandardy kórdim. Ár jyldary basylǵan kitaptar 50-100 teńgeden satyldy. Kitaptardyń talan-tarajǵa túsip jatqanyn estip kelgen bir kisiniń kitaphana meńgerýshisi Klara Bilálovaǵa: «Maǵan otqa jaǵatyn kitap berińizó» degen sózin estidim. Sol kezde Klara Bilálovanyń qandaı kúı keshkenin qaıdam, ózim áligi jannyń jaǵasyna jarmasqym keldi. Kitaptardyń birazyn qaladaǵy joǵary jáne arnaýly orta oqý oryndaryna tegin taratyp berýi de ol kisiniń aqyldylyǵyn tanytsa kerek.

Ótken is ótti, endi ony ornyna keltire almaısyń. Kitaphana qyzmetkerleri óte zárý degen qundy kitaptardy saqtap qaldy. Kitaphananyń jurnaǵy bary kóńilge demeý. Toqsanynshy jyldardyń ortasynda jappaı mádenıet oshaqtary jekeshelenip, saýda dúkenderine aınalyp jatqanda osy kitaphana meńgerýshisi Klara Bilálovanyń kitaphanany saqtap qalǵany erlikpen parapar is boldy. Jetpis jyldyq tarıhy bar kitaphanany kózdiń qarashyǵyndaı saqtap, osy kúnge aman jetkizý ońaı sharýa bolmasa kerek. Kitaptyń qadir-qasıetin sezinip ósken jan osy kitaphanany saqtap qalý úshin qanshama qıynshylyqty bastan ótkerdi deseńizshi. Dúnıe jınaýǵa qyzyqpaıtyn, rýhanı azyqty qanaǵat tutatyn Klara Bilálovanyń jasy ulǵaıǵan shaǵynda osy kitaphananyń qurmetti meńgerýshisi etip qoısa da jarasar edi.

Bizdiń balalyq shaǵymyz elimizdiń qıyn kezeńine tap keldi. Bala kezimizde oınaıtyn oıynshyq ta bolmady. Árip tanyǵannan qolymyzdan kitap túspedi. Sol kitapty qalap, úıshik jasap oınaıtynbyz. Uzaq jyl laýazymdyq qyzmette júrgende kitaptan qol úzbedik. Adam bolyp qalyptasýymyzda kitaptyń paıdasy zor boldy. Keıingi kezde sol rýhanı baılyǵymyzdyń qadir-qasıeti ketip tur. Oǵan mysaldy alystan izdemeı-aq, «Mádenıet» kitaphanasynyń búgingi múshkil halinen kórýge bolady. Jyl basynda kitaphana taǵdyry týraly gazetter jamyraı jazyp jatqanda «Almaty aqshamy» gazeti de eki márte qalam tartqany esime túsip, habarlasyp otyrmyn. «Mádenıet» kitaphanasynyń odan keıingi taǵdyrynan qandaı habar bilesińder? Ýaqyt sozyp, bolǵan jaıdyń izin sýytyp, shujyq, ne kartoshka satatyn dúkenge aınaldyryp jiberdi me degen qaýpim de joq emes.

Jyl basynda Almatynyń ortalyq kósheleriniń birine ornalasqan «Mádenıet» kitaphanasynyń basyndaǵy múshkil hali týraly gazetimizde oryndy másele kóterip, qala ákimdiginiń bul kitaphananyń Ortalyqtandyrylǵan kitaphanalar júıesine ótetini, bilim oshaǵynyń jaǵdaıy jaqsaratyny týraly arnaıy jaýabyn alyp, kóńil demdegen edik. Arada alty aı ótkende qalanyń baıyrǵy turǵyny, kitap janashyry Qarlyǵash apaıymyzdyń redaktsııaǵa soqqan qońyraýy «Mádenıet» kitaphanasynyń taǵdyryna qaıta oralýymyzǵa alyp keldi.

Osy «Mádenıet» kitaphanasynyń meńgerýshisi Klara Bilálovamen de habarlastyq.

- Jyl basynda «Almaty» ÁKK (áleýmettik-kásipkerlik korporatsııasy) saýda dúkenin ashpaq bolyp, kitaphana jaıyn bosatýdy talap etkende jetpis jyldyq tarıhy bar 136 myń kitap qoryn jınaqtaǵan bilim oshaǵy qıyn jaǵdaıǵa tap kelgenin buqaralyq aqparat quraldarynyń jýrnalısteri, onyń ishinde ózderiń de bar, jamyraı jazyp, qaterdiń bulty seıilgendeı bolyp edi. Aınalaıyn, jany sergek jýrnalıst ini-qaryndastarym áli kúnge habarlasyp, jaǵdaıdy bilip turady. Biraq, sodan beri áli qozǵalys bolmaı tur. Kitaphana týraly tıisti oryndardan habar kútip, úıde jatyrmyn. Meniń ómirlik joldasym Jeken Jumahanov uzaq jyl jýrnalıst bolyp qyzmet atqaryp, talaı jannyń taǵdyryna aralasqan edi. Óz basym jýrnalıster qaýymynyń el úshin atqaryp júrgen qyzmetine rızamyn. Ózim 43 jyl qyzmet atqarǵan kitaphananyń basyna kún týǵanda Astanadan Imanǵalı Tasmaǵambetov habarlasyp, qandaı kómek kerek ekenin surap, Elordaǵa kóshirip almaq boldy. Elimizdiń jomart júrekti azamattary da qolushyn sozyp, qoltyǵymyzdan demedi. Almaty qalasy Ákiminiń orynbasary S.Seıdýmanov kelip kórip, Ortalyqtandyrylǵan kitaphana júıesine qosatyn bolǵandaryn aıtty. Qyzmetkerlerimiz ózge kitaphanalarǵa ýaqytsha aýystyryldy. Olar da maǵan telefon shalyp, habarlasyp turady. Úırengen oryndaryn qımaıdy, oqyrmandaryn saǵynady. Bizdiń kitaphananyń oqyrmany kóp edi. Olar da kitaphanaǵa aınalyp soǵyp, tóńiregindegi dúkenderden surap turady eken. Kitaphana ǵımaratyna jóndeý jumystary da áli kúnge bastalǵan joq.

«Mádenıet» kitaphanasynyń búgingi jaı-kúıi týraly Almaty qalalyq Mádenıet basqarmasy Tarıhı-mádenı mura, mýzeıkitaphana bóliminiń bastyǵy Lázzat SAǴYNDYQOVAǴA habarlasyp, tómendegideı jaýap aldyq:

- 2012 jyldyń basynda Almaty qalasy Ákimdigi «Mádenıet» JShS qaramaǵynda bolǵan kitaphananyń jabylyp, qory men múlki talan-tarajǵa túsýine baılanysty, osy is-áreketterdi toqtatyp, kitaphanany saqtap qalý maqsatynda ony Almaty qalasynyń Ortalyqtandyrylǵan kitaphanalar júıesiniń quramyna berý týraly sheshim qabyldaǵan bolatyn.

Osyǵan oraı, Mádenıet basqarmasy kitap qoryn esepke alý boıynsha jumystar júrgizdi.

Kitaphana Almaty qalasy, Almaly aýdany, Baıtursynov kóshesi, 75/79 jaı «Almaty» Áleýmettik-kásipkerlik korporatsııasy» Ulttyq kompanııasy» aktsıonerlik qoǵamyna tıesili.

Kitaphana tolymdy qyzmet atqaryp, jumys isteýi úshin óte kóp jumys qajet etedi.

Birinshiden, kitaphana ornalasqan jaıǵa kúrdeli jóndeý jumysyn júrgizý qajet.

Ekinshiden, kitaphanadaǵy kitap qoryn tolyqtyrý qajet.

Úshinshiden, kitaphananyń jumys isteýine qajetti jabdyqtarmen qamtamasyz etilýi kerek.

Qazirgi kúni Mádenıet basqarmasymen atalǵan kitaphanany qurýdyń tujyrymdamasy jasalyp jatyr. Tujyrymdama bekitilgende jergilikti bıýdjetten qarajat bólý úshin tamyz aıynda qalalyq Máslıhat sesııasynyń qaraýyna engiziledi.

Kitaphana tolyǵymen joǵaryda atalǵan is-sharalar (jóndeý jumystaryn júrgizý, tıesili jabdyqtar men kitap qoryn tolyqtyrý) júzege asyrylǵan soń óz qyzmetin bastaıtyn bolady.