Maǵan Olımpıada medalin alýǵa bir qadam qaldy – Ábıba Ábýjaqynova

ATYRAÝ. KAZINFORM – Qazaqstandyq dzıýdoshy Ábıba Ábýjaqynova 27 shildede Parıj Olımpıadasyndaǵy alǵashqy beldesýin ótkizedi. Dzıýdoshy arý dúbirli dodadaǵy beldesýi qarsańynda sporttaǵy alǵashqy qadamy, ózin jetistikke jetkizgen bapkerleri týraly aıtyp berdi.

Ábıba Ábýjaqynovanyń aıtýynsha, dzıýdoǵa 4 jasynda kelgen. Sporttyń bul túrin ózi tańdaǵan. Al, 2015 jyly Almaty sport kolledjine oqýǵa túsken.

«Sol oqý ornynda alǵashqy jattyqtyrýshym Nurbol Súleımenovpen kezdestim. Alǵashqy bapkerimmen 9 jyldan beri jumys istep kelemin. Jattyqtyrýshymnyń keńesimen úlken jetistikterge jettim. Atyraý oblysynyń atynan kúresýdi 2019 jyly bastadym. Qazirgi jattyqtyrýshym Meıirjan Esmaǵambetovtiń jetistikterge jetýime kóp kómegi tıdi. Osy jattyqtyrýshylarymnyń eńbeginiń nátıjesinde qazir álemdik reıtıngte úshinshi orynda turmyn», -dedi Ábıba Ábýjaqynova.

Ol – dzıýdodan álemdik, qurlyqtyq dodalarda medal ıelengen alǵashqy qazaq qyzy. Álem chempıonatynda eki ret qola medalǵa ıe bolǵan. Azııa chempıonatynyń eki dúrkin kúmis júldegeri atandy. Azııa oıyndarynan da kúmis medalǵa ıe bolǵan. Sondaı-aq, Grand Slam jáne Grand Prix týrnırleriniń birneshe dúrkin júldegeri atanǵan.

«Ózimniń bapkerlerime erekshe alǵysymdy bildiremin. Olar maǵan árqashan qoldaý bildiredi. Árqashan senim artady. Men eldiń, bapkerlerimniń senimin aqtaý úshin kúresemin. Endi maǵan Olımpıada medalin alýǵa bir qadam qaldy», - dedi Ábıba Ábýjaqynova.

Eske sala ketelik, budan buryn Atyraý oblystyq Dzıýdo federatsııasynyń vıtse-prezıdenti Ábıba Ábýjaqynovanyń Olımpıada júldesiniń jolashary bolýy múmkin ekenin aıtqan edi.