Maǵan eshkim eshteńe isteı almaıdy: Almatyda zańǵa baǵynbaǵan júrgizýshi áıel jaýapqa tartyldy
ASTANA. KAZINFORM – Almatyda áleýmettik jelide jol erejesin buzǵanyn kórsetip, zań talaptaryna baǵynbaıtynyn málimdegen júrgizýshi áıel jaýapqa tartyldy, dep habarlady Polisia.kz.
Polıtsııa qyzmetkerleri áleýmettik jelide taraǵan vıdeonyń avtoryn anyqtaǵan. Beınejazbada áıeldiń qaýipsizdik beldigin taqpaı kólik basqarǵany jáne bul talapty oryndaýdan ashyq bas tartqany baıqalady.
Tekserý barysynda júrgizýshiniń buǵan deıin sot sheshimimen kólik basqarý quqyǵynan aıyrylǵany belgili boldy. Soǵan qaramastan, ol qaıtadan rólge otyrǵan.
– Polıtsııanyń ustanymy aıqyn: zań aldynda bári teń. Eshqandaı tanystyq ta, baılanys ta, orynsyz málimdeme de zań talaptaryn buzýǵa negiz bola almaıdy. Ózin zańnan joǵary sanap, belgilengen talaptardy elemeýge eshkimniń quqyǵy joq. Zań bárine ortaq, al ony buzǵan adam jaýapkershilikten jaltara almaıdy, – delingen polıtsııa aqparatynda.
Áıelge qatysty birneshe ákimshilik quqyq buzýshylyq boıynsha materıaldar rásimdeldi. Atap aıtqanda, kólik basqarý quqyǵynan aıyrylǵannan keıin rólge otyrý, qaýipsizdik beldigin taqpaý, sot sheshimin oryndamaý jáne jalǵan aqparat taratý derekteri tirkelgen.
Jınaqtalǵan materıaldar sotqa joldanyp, avtokólik arnaıy aıyppul turaǵyna qoıyldy.
Sonymen qatar kólik júrgizý quqyǵynan aıyrylǵan adamǵa avtokóligin bergen kólik ıesi de jaýapkershilikke tartyldy.
Aıta keteıik, buǵan deıin Almatyda jol erejelerin óreskel buzǵan júrgizýshi 30 táýlikke qamalyp, 100 AEK kóleminde aıyppul arqalaǵan bolatyn.
