Men almaǵan Olımpıada altyny Parıjde otandastaryma buıyrsa eken – Ádilbek Nııazymbetov
ASTANA. KAZINFORM – Qazaqstannyń eńbek sińirgen sport sheberi, Qurmet ordeniniń ıegeri, Olımpıada oıyndarynyń eki dúrkin kúmis júldegeri Ádilbek Nııazymbetov qazaq boksshylary Parıj Olımpıadasynda júldege talasýǵa tolyq múmkindigi baryn aıtty.
– Ádilbek Sábıtuly, Rıo Olımpıadasynan keıin úlken sporttan ketkenińdi jaqsy bilemiz. Qazir Olımpıadanyń eki dúrkin kúmis júldegeri qaıda, ne istep júr?
– Sharshy alańnan ketsem de, sport áleminen ketken joqpyn. Qazirgi tańda men Aqtaý qalasyndaǵy oblystyq olımpıadalyq daıarlaý ortalyǵynda boks mektebiniń dırektorymyn. Ózim aınalysqan sport túrinen jastarǵa tálim-tárbıe berip, tájirıbemmen bólisip júrmin.
– Ortalyqtaǵy jastardyń sportqa degen qyzyǵýshylyǵy qalaı? Siz sııaqty Olımpıada júldegeri bolǵysy keletin jetkinshekterdiń qatary kóp pe?
– Kóp dep aıta alamyn. Munda bokstan úzdik nátıjelerge qol jetkizip, Olımpıadaǵa barýdy armandap júrgen, talpynyp júrgen jas jetkinshekter jeterlik. Bizdiń mindetimiz – sol jastarǵa jol siltep, bolashaq chempıondardy daıyndaý.
– Bıyl – Olımpıada jyly. Basty dodada boksshylardan kimderge senim artasyz?
– Qazirgi tańda Myrzaǵalı Aıtjanov baptaıtyn Qazaqstan ulttyq quramasynda kil myqtf boksshylar jınalǵan. Olardyń arasynan men eshkimdi bóle-jarǵym kelmeıdi. Barlyǵynyń da júldege talasýǵa múmkindigi bar. Men tek, barlyǵyna sáttilik tileımin. Bizde qazir Qamshybek Qońqabaevtan basqasy áli joldama alyp úlgergen joq. Alda eki irikteý týrnıri tur. Men sol jarystardan ulttyq qurma Parıjge tolyq quramda joldamany jeńip alady dep senemin.
– Ózińiz bir emes, eki Olımpıada oıyndaryna qatysyp, eki márte kúmis júldeger atandyńyz. «Átteń-aı» degen kezińiz boldy ma?
– Iá, men eki ret Olımpıadaǵa bardym. Ekeýinen de júldesiz qaıtqam joq. Tek, altyn ala almaı ketkenim bolmasa, basqa ókinishim joq. Shamam kelgenshe el úmiti úshin baryn saldym. Qolymnan kelgendi jasadym. Jankúıerlerimniń kóńilin jabyrqatqan joqpyn dep oılaımyn. Men almaǵan altyndy aldaǵy Olımpıadada qazirgi boksshylarymyz alsa eken degen tilegim bar.
– Áńgimeńizge rahmet!