Maǵan alataıaq qajet - jol polıtsııasy qyzmetkeri
ASTANA. QazAqparat - Bıyldan bastap Qazaqstannyń jol-patrýldik polıtseıleri alataıaqtaryn tastap, jol qozǵalysy erejelerin buzǵandardy tek avtopatrýl arqyly ǵana toqtatýǵa kóship otyr. Jol qıylysyndaǵy qozǵalysty retteý jumysy da alataıaqsyz júrigizilýi tıis. QazAqparat tilshisine suhbat bergen jol-patrýldik polıtsııa qyzmetkeri jańa jyldaǵy jańalyqtyń áserimen bólisti. Alaıda óz atyn jazbaýdy ótindi.
«Shynymdy aıtsam, ózińdi birtúrli sezinedi ekensiń. Qolda alataıaqtyń bolǵanyna úırenip qalǵansyń ǵoı. Ásirese, jol qozǵalysyn rettegende alataıaqty aınaldyrýǵa úırengenbiz. Sosyn kólikti qolmen toqtatqany da qyzyq. Endi, qazirgi jańalyqqa da úırenetin shyǵarmyz. Degenmen, alataıaq qajet dep oılaımyn. Alataıaqtyń ishki jaryǵy bolǵannan keıin túngi ýaqytta anyq kórinedi. Onsyz borandy kúni nemese dalany tuman basqanda jol qozǵalysyn retteý qıyn. Kólik júrgizishýleri meniń qandaı belgi berip turǵanymdy kórmeı qalýy ábden múmkin. Bilmeımin, bizge jaryqqa shaǵylysatyn qolǵap beretin shyǵar. Sonda jol-patrýldik polıtsııa qyzmetkeriniń belgisi anyq kórinedi», -deıdi ol.
Aıta keteıik, 1 qańtardan bastap elimizdegi jol-patrýldik polıtsııa qyzmetkerleri tolyǵymen avtopatrýlge aýysty. Budan bylaı kóshede erejeni buzǵan kólik júrgizýshilerin alataıaqpen toqtatýǵa ruqsat joq. Qala syrtyndaǵy beketterde mashınany toqtatýǵa bolady.Alaıda sonyń ózinde polıtsııa qyzmetkeri qolmen belgi berýi tıis.
