«Magadjan» bógetiniń qıraýy: salǵyrttyqtan bolǵan apat úshin sheneýnikke úkim shyqty

ASTANA. KAZINFORM — QMA Aqtóbe oblysy boıynsha departamenti Hromtaý aýdanyndaǵy «Magadjan» sý bógetiniń qıraýyna ákelgen nemquraılylyq faktisi boıynsha tergeýdi aıaqtady. 

— Bógettiń buzylýyna jergilikti atqarýshy organ qyzmetkeriniń óz qyzmettik mindetterin tıisinshe oryndamaýy sebep boldy. Atalǵan ákimdik qyzmetkeri gıdrotehnıkalyq qurylystyń tehnıkalyq jaǵdaıyn baqylamaǵan, tekseris júrgizbegen jáne apattyń aldyn alýǵa qajetti sharalardy qabyldamaǵan.

Saldarynan Alǵa aýdanynyń eldi mekenderi men Іlek jáne Qarǵaly ózenderiniń mańyndaǵy baý-baqsha ujymdary sý astynda qaldy. 215 adam, onyń ishinde 96 bala qaýipsizdik jerge jetkizildi. Keltirilgen shyǵyn 211 mln teńgeden asty, — delingen QMA habarlamasynda.

Sot kináli tulǵaǵa 1 jyl 6 aı merzimge bostandyǵyn shekteý jazasyn taǵaıyndady.

Úkim zańdy kúshine engen joq.

Eske salaıyq, buǵan deıin osy is boıynsha «Tulpar TK» JShS dırektory qyzmettik mindetterine nemquraıly qaraǵany úshin sot úkimimen kináli dep tanylǵan. Sot úkimimen oǵan eki jarym jyl bas bostandyǵyn shekteý jazasy taǵaıyndalǵan. 

Aıta ketelik «Magadjan» bógetin kútip ustamaǵan kásipker tergelip jatqany týraly jazǵan edik.