MAEK-tegi apattyń sebebin anyqtaý úshin komıssııa jumysyn bastady
Jumys toby ortalyq dıspetcherlik pýnktine baryp, elektr generatsııalaıtyn ortalyqtyń jumysymen tanysty. Osydan keıin komıssııa músheleri bir kún buryn apat bolǵan elektr stantsııasyna bardy.
№1 energııa blogy toqtaǵan sátten bastap qazandyq salqyndatý protsesinde tur. №1 energoblokty jóndeý jumystary 5 shildege josparlanǵan. Jóndeý jumystary aıaqtalǵannan keıin tolyq kólemde iske qosylady.
«Mańǵystaý atom energetıkalyq kombınatynyń aýmaǵynda úsh energııa quraýshy stantsııa (JES, JEO-1, JEO-2) bar, olardyń árqaısysy energııa bloktarynan turady. JES energııa bloktarynyń birinde jóndeý jumystary júrgizilip jatyr, qalǵan ekeýi jumys isteıdi. Keshe, 3 shildede jylý elektr stantsııasynda júktemesi 130 MVt bolatyn №1 energoblok apatty jaǵdaıda ajyratyldy. Osyǵan oraı, búgingi kúni stantsııada tek bir energııa blogy jumys isteıdi. Meniń tapsyrmam boıynsha óńirde apattyń sebebin anyqtaý úshin arnaıy komıssııa quryldy. Apatty joıý úshin shuǵyl sharalar qabyldaý qajet. Bul jerde energııany turǵyndarǵa berý boıynsha esh shekteýler joq. Biraq apattyń saldary iri kásiporyndarǵa áser etti. Mamandardyń aıtýynsha, toq kózinen ajyratylǵan №1 energııa blogy jóndelgennen keıin tolyq kólemde iske qosylady», - dedi Mańǵystaý oblysynyń ákimi Nurlan Noǵaev.
Oblys ákimi QR Prezıdenti Qasym-Jomart Toqaevtyń tapsyrmasy boıynsha Atyraý MÓZ jáne Mańǵystaý atom energetıkalyq kombınatynda bolǵan oqıǵanyń sebepterin tergeý boıynsha Memlekettik komıssııa qurylǵanyn aıtty.
«Memlekettik komıssııany Premer-Mınıstr Álıhan Smaıylov basqarady. Jaǵdaı Úkimettiń baqylaýynda. Bolashaqta basqa apattardyń aldyn alý úshin bolǵan oqıǵanyń mán-jaıyn anyqtaý qajet. Memleket basshysynyń qoldaýymen MAEK-ti jańǵyrtý boıynsha kóptegen jumys júrgizilip jatyr. Jalpy somasy 28 mlrd teńgege bolatyn qýattylyǵy táýligine 24 000 m3 sý qondyrǵysyn salýǵa 10 mlrd teńge bólindi. Budan basqa, Quıylys ken ornynan MAEK pen Aqtaý sý tushytý zaýytyna deıingi uzyndyǵy 47 shaqyrym sý qubyryn salý boıynsha jalpy somasy 18 mlrd teńgege joba iske asyryla bastady. Sonymen qatar, bıyl biz Úkimetke kásiporyn jumysyn turaqtandyrý úshin jabdyqtar satyp alýǵa 4 mlrd 900 mln teńge kóleminde qarajat bólý týraly usynys engizdik. Qazirgi ýaqytta Premer-Mınıstrdiń tapsyrmasy boıynsha 4 mlrd 900 mln teńge bólinedi. Bıyl mekemeniń turaqty jumysy úshin kúrdeli jáne aǵymdaǵy jóndeý jumystaryn júrgizýge MAEK kásiporny óz qarajatynan 6 mlrd 800 mln teńge bóldi. Bul mekemeniń oblys úshin mańyzdylyǵyn eskere otyryp, oblystyq bıýdjet rezervinen 2 mlrd 600 mln teńge bólindi», - dedi oblys ákimi Nurlan Noǵaev.
Aıta ketsek, atalǵan komıssııa quramynda óńir basshysy Nurlan Noǵaev, Mańǵystaý oblysy ákiminiń birinshi orynbasary, Aqtaý qalasynyń ákimi, «MAEK-Qazatomónerkásip» JShS Bas dırektory, «MEK» AQ basqarma tóraǵasy, atom jáne energetıkalyq qadaǵalaý men baqylaý komıtetiniń Mańǵystaý oblysy boıynsha aýmaqtyq departamentiniń basshylyǵy kirdi.
Buǵan deıin habarlaǵanymyzdaı, Premer-Mınıstr Álıhan Smaıylov Mańǵystaý atom energetıkalyq kombınatynda jáne Atyraý munaı óńdeý zaýytynda bolǵan apattardyń sebepterin tergeý jónindegi memlekettik komıssııanyń otyrysyn ótkizdi.
