MAEK-tegi jóndeý jumystary kúzden keıin de jalǵasady

Mańǵystaý atom energetıkalyq kombınatyndaǵy jóndeý jumystary kúzden keıin de jalǵasady. «Samuryq-Qazyna» AQ qoǵamdyq keńesinde «KEGOK» AQ ulttyq dıspetkerlik ortalyǵynyń dırektory Eraly Shynasylov osyndaı málimet aıtty, dep habarlaıdy QazAqparat tilshisi.

«MAEK-tegi №2 Jylý-elektr ortalyǵynyń eki týrboagregaty isten shyqqan bolatyn. Qandaı sabaq aldyńyzdar? Ondaı apat bolmaý úshin ne istep jatyrsyzdar?», - dep surady qoǵamdyq keńes tóraǵasy Bolat Jámishev.

«KEGOK» ókiliniń aıtýynsha, atalǵan №2 jylý-elektr ortalyǵynyń generatoryn jóndemese, apat qaıtalanýy múmkin.

«MAEK týraly aıtsaq, meniń bilýimshe kásiporyn jańa rettegish qondyrǵy salyp jatyr. Onyń ishinde paıdaly áser koeffıtsenti anaǵurlym joǵary gaz týrbınasyn ornatady. Qazir qoldanystaǵy qondyrǵyny rekonstrýktsııalap jatyr. №2 blok jóndelýde. Onyń generator biligi Almatyda jóndelip jatyr. Qarashanyń aıaǵyna qaraı iske qosylý kerek. Osydan keıin №3 blokta jóndeý jumystary bastalady. Bir sózben aıtqanda ol jerde generatordy jóndemese bolmaıdy», - dedi «KEGOK» AQ ulttyq dıspetkerlik ortalyǵynyń dırektory Eraly Shynasylov.