MAEK sý tuşytý zaýytyna 158 mıllıon teńge qaryz
AQTAÝ. KAZINFORM – Mańǵystaý atom energetıkalyq kombınaty men «Kaspıı» sý tuşytý zaýyty - aımaqtyń iri aýyz sý óndirýshi kompanııalary. Alaıda, energetıkalyq kombınat zaýytqa qaryz bolyp qalǵan.
Mańǵystaý oblystyq soty taratqan málimetke súıensek, is oblystyq mamandandyrylǵan aýdanaralyq ekonomıkalyq sotynda qaralǵan.
MAEK mekemesi byltyr maýsym aıynda Aqtaý qalasyndaǵy jeke jáne zańdy tulǵalar úshin aýyz sýdyń jetkiliksiz óndirilýine jáne jetkilikti qamtamasyz etilmeýine baılanysty «Kaspıı» sý tuşytý zaýytynan kómek suraǵan. Zaýyt 1 m3 úshin 449,24 teńgege sý berýge kelisken.
Osylaısha, zaýyt MAEK-ke qazan aıynda 64 560 790,27 teńge kóleminde 143 710 m3 jáne qarasha aıynda 97 020 565,84 teńge kóleminde 215 966 m3 sý bergen.
Al, MAEK bolsa 3 288 768,84 teńge kóleminde ishinara ǵana tólem jasap, qalǵanyn qaıtarmaǵan.
Mańǵystaý atom energetıkalyq kombınaty óz mindettemelerin oryndamaǵany úshin, zaýyt óz quqyqtaryn qorǵaý úshin Mańǵystaý oblysynyń mamandandyrylǵan aýdanaralyq ekonomıkalyq sotyna júgingen. Talap-aryz boıynsha bereshek kólemi 158 311 850 teńge 77 tıyndy qurady.
Sotta qaryz daýy medıatıvtik kelisimmen aıaqtalǵan. ıAǵnı, jaýapker talapty tolyq moıyndap, zaýyttyń paıdasyna 2025 jylǵy 10 qańtarǵa deıingi merzimde 158 311 850 teńge 77 tıyn mólsherinde bereshek somasyn óteýge mindetteldi.
Sot zańdy kúshine engen.
Eske salaıyq, Aqtaýda maýsym, shilde aılarynda aýyz sý tapshylyǵy týyndap, birneshe kún boıy sýsyz otyrǵan turǵyndar joldy japqan bolatyn.