Madýronyń jubaıy AQSh túrmesinde júrek talmasyna ushyrady
ASTANA. KAZINFORM — Venesýelanyń burynǵy prezıdenti Nıkolas Madýronyń jubaıy Sılııa Flores jazda AQSh túrmesinde otyrǵan kezinde júrek talmasyna ushyraǵan, dep habarlaıdy Kazinform agenttigi.
Associated Press agenttiginiń málimetinshe, Sılııa Florestiń advokattary onyń densaýlyǵyna eleýli qaýip tónip turǵanyn aıtyp, mundaı dertti túrme jaǵdaıynda tıisti deńgeıde emdeý múmkin emes ekenin jetkizgen.
Zańgerlerdiń sózinshe, oǵan Nıý-Iorktegi úıde táýlik boıy kúzet qaraýynda turýǵa ruqsat berýge bolar edi.
Olar sondaı-aq 69 jastaǵy Florestiń AQSh áskerı operatsııasy kezinde «qabyrǵaǵa nemese sýyrmaǵa soǵylǵannan» keıin denesinde jazylmaıtyn tyrtyqtar qalǵanyn málimdedi.
Advokattarynyń aıtýynsha, Brýklındegi tergeý ızolıatorynda qamaýda otyrǵan kezeńde Madýronyń jubaıy 11 keli salmaq tastaǵan. Oǵan júregine ota jasaý qajet bolýy múmkin ekeni de aıtylǵan. Sondaı-aq olar Flores «únemi basy aınalyp, álsirep, tynysy tarylyp» júrgenin, shildede júrek talmasyna ushyraýy da yqtımal ekenin málimdedi.
Beısenbi kúni ol sotqa barady, onda qorǵaýshylary Sılııa Floresti AQSh túrmesinen bosatyp, úıqamaqqa aýystyrýdy suramaq.
Alaıda prokýratýra kepil tólep bosatý týraly ótinishke qarsy shyǵyp, «qashyp ketý qaýpi óte joǵary ári qoǵamǵa qaýip tóndirýi múmkin» ekenin alǵa tartty. Sondaı-aq prokýrorlar onyń medıtsınalyq kómekke muqtaj bolǵan kezderinde túrmeden jergilikti aýrýhanaǵa jetkizilip, qajetti em alǵanyn aıtty.
Buǵan deıin federaldy prokýrorlar Venesýelanyń burynǵy prezıdenti Nıkolas Madýro men onyń jubaıy Sılııa Floresti Venesýela túrmelerinde amerıkalyqtardy azaptady degen kúdikke baılanysty jańa aıyptar taǵýǵa nıet bildirgeni habarlanǵan edi.
