Madýronyń jaqtastary Karakasta prezıdentti qaıtarýdy talap etti
ASTANA. KAZINFORM – Venesýela astanasy Karakasta eldi bılep kelgen solshyl kúshter qozǵalysynyń jaqtastary kezekti mıtıng ótkizdi. Olar prezıdent Nıkolas Madýrony elge qaıtarýdy talap etti, dep habarlaıdy DW.
Mıtıngke qatysýshylardyń aıtýynsha, Nıkolas Madýro bir apta buryn amerıkalyq áskerı kúshter tarapynan ustalyp, AQSh-qa áketilgen. Osydan keıin onyń jaqtastary Karakas kóshelerine kún saıyn shyǵyp, prezıdenttiń bosatylýyn talap etip keledi.
DW málimetinshe, Madýro men onyń jubaıy Nıý-Iorkke jetkizilgennen keıin Venesýela basshysy sot aldyna shyǵarylǵan. Osy oqıǵalar aıasynda elde qoǵamdyq-saıası ahýal kúrt shıelenise túsken.
Sonymen qatar Venesýelanyń Syrtqy ister mınıstrligi AQSh-pen dıplomatııalyq qatynastardy qalpyna keltirý jóninde kelissózder bastalǵanyn habarlady. Bul baılanystar 2019 jyly AQSh-tyń prezıdenti Donald Tramptyń alǵashqy merzimi kezinde úzilgen bolatyn. Vashıngton tarapy amerıkalyq delegatsııanyń Karakasqa baryp, elshilik jumysyn qaıta jandandyrý máselesin talqylaǵanyn rastady.
Osy kelissózder aıasynda Venesýelada ýaqytsha prezıdent mindetin atqarýshy Delsı Rodrıges saıası tutqyndardy bosatý týraly málimdedi. Quqyq qorǵaýshylardyń dereginshe, 10 qańtarǵa deıin keminde 18 adam túrmeden bosatylǵan.
Soǵan qaramastan, basqa saıası tutqyndardyń týystary Karakastyń shyǵysyndaǵy El-Rodeo túrmesiniń mańynda kezekshilik etip, jaqyndarynyń jaqyn arada bostandyqqa shyǵýyn kútýde. Quqyq qorǵaý uıymdarynyń habarlaýynsha, Venesýelada áli de 850-den astam saıası tutqyn bar, olardyń basym bóligi Madýro bıligi kezeńinde qamaýǵa alynǵan.
Human Rights Watch uıymy buǵan deıin kóptegen tutqynnyń «ınkommýnıkado» rejıminde, ıaǵnı syrtqy álemmen baılanyssyz ustalyp otyrǵanyn málimdegen. Mundaı jaǵdaı adam quqyǵyn óreskel buzý ári azaptaýdyń bir túri retinde baǵalanady.
Osy tusta Donald Tramp saıası tutqyndardyń bosatylýyn «beıbitshilikke umtylystyń belgisi» dep atap, Venesýelaǵa josparlanǵan soqqylardyń ekinshi tolqynyn toqtatqanyn málimdedi. Sonymen birge ol venesýelalyq oppozıtsııa lıderi Marııa Korına Machadomen aldaǵy kezdesýdi atady.
Buǵan deıin Venesýela Ulttyq assambleıasynyń spıkeri Horhe Rodrıges sheteldik jáne venesýelalyq tutqyndardyń edáýir bóligi bosatylatynyn málimdegen bolatyn.
Eske salaıyq, 3 qańtarda AQSh Venesýela aýmaǵynda arnaıy operatsııa júrgizip, Nıkolas Madýro men onyń jubaıy Sılııa Floresti Karakasta ustap, Nıý-Iorkke jetkizgeni habarlanǵan. Olarǵa narkoterrorızm, kokaın tasymaldaý, avtomatty qarý men jarylǵysh zattardy saqtaý jáne AQSh-qa qarsy qastandyq jasaý baptary boıynsha aıyp taǵylǵan.
Sol kúni Venesýela Joǵarǵy soty Delsı Rodrıgeske prezıdenttik ókilettikti tolyq kólemde berip, ol ýaqytsha memleket basshysy retinde ant qabyldaǵan. Al Madýro men onyń jubaıy ózderine taǵylǵan aıyptardy moıyndamaıtynyn málimdedi. Kelesi sot otyrysy 17 naýryzǵa belgilengen.